Jyl bastalǵaly halyqtyń polısııa qyzmetine degen senimin arttyrýǵa jáne olardyń jumysynyń ashyqtyǵyn, jaýapkershiligin, aıqyndyǵyn qalyptastyrýǵa baǵyttalǵan «Adal polıseı» keń aýqymdy aksııasy bastalǵan. Aksııa aıasynda Aqmola oblysynda patrýldik polısııanyń qyzmettik avtokólikterinde, sondaı-aq ákimshilik ǵımarattarda ornalastyrylǵan QR-kodtar jańartyldy, dep habarlaıdy Egemen.kz.
Ishki ister mınıstrliginiń málimetinshe, QR-kodtyń kómegimen azamattar naqty ýaqyt rejıminde kez kelgen quqyqqa qaıshy áreketter, sybaılas jemqorlyq faktileri nemese polısııa qyzmetkerleri tarapynan laýazymdyq ókilettikterdi asyra paıdalaný týraly habarlaı alady.
Silteme boıynsha ótkennen keıin ótinish berýshi avtomatty túrde WhatsApp messendjeriniń chatyna túsedi, onda anyqtalǵan zań buzýshylyqtar týraly habarlamany joldaı alady. Halyqqa yńǵaıly bolý úshin QR-kodtar patrýldik polısııanyń barlyq qyzmettik kólikterinde, ýchaskelik polısııa pýnktterinde jáne ishki ister organdarynyń ákimshilik ǵımarattarynda ornalastyrylǵan.