Qyzylorda oblystyq tarıhı-ólketaný mýzeıinde «Tarıhta tańbalanǵan Áýlıeata tulǵalary» atty kórme ashyldy. Jambyl oblystyq tarıhı-ólketaný mýzeıiniń 95 jyldyǵy kóne Tarazdan túlegen tulǵalar mereıtoıyna oraı uıymdastyrylǵan kórme «Mýzeı tour: Eksponattar ekspedısııasy» mýzeılik jobasy aıasynda uıymdastyrylyp otyr.
Ekspozısııada Áýlıeata topyraǵynda týyp, memleket tarıhy men ult rýhanııatynda óshpes iz qaldyrǵan qaıratkerlerdiń jeke zattary, sırek fotosýretteri, kitaptary men qoljazbalary bar. Keń zalǵa kirgennen áıgili Baýyrjan Momyshulyna, Jeltoqsan qaharmany Qaırat Rysqulbekovke arnalǵan buryshtar, solar tutynǵan zattar kózge túsedi. Baýyrjan batyrǵa arnalǵan múıiste tek Jýaly aýdanynyń ózinen ásker, avıasııa, ishki ister salasynda qyzmet etken 13 general shyqqany týraly derek jarııalanypty.
Qundy jádigerler qatarynda qazaq teatrynyń sahnasy men kınoónerinde óshpesteı iz qaldyrǵan Asanáli Áshimovtiń jeke zattary da bar. Áıgili akterdiń «Qyz Jibek» fılminde kıgen saýyty men dýlyǵasy, ustaǵan qylyshy kórmege kelgenderdiń qyzyǵýshylyǵyn týdyryp tur. Teatrda qoıylǵan spektaldegi ár ról týraly jazylǵan birneshe qoıyn dápter óner sańlaǵynyń kórermen aldyndaǵy jaýapkershilikti tereń sezingendigin ańǵartady.
Yqylas Dúkenulynyń qobyzy men áıgili halyq aqyny Kenenniń dombyrasy men shapany, eki márte Sosıaıstik Eńbek eri Jazylbek Qýanyshbaevtyń qamshysy qoıylǵan buryshqa da aıaldaýshylar qatary az emes. Bul kórme az kúnnen keıin Shıeli, Jańaqorǵan aýdandaryndaǵy Rýhanııat ortalyqtaryna jol tartady.
«Alda Taldyqorǵandaǵy Ilııas Jansúgirov, Nurmolda Aldabergenov mýzeılerin kútip otyrmyz. Jalpy, «Mýzeı tour: Eksponattar ekspedısııasy» aıasynda bıyl oblysta Batys Qazaqstan, Ulytaý, Túrkistan oblystary men Shymkent qalalyq mýzeıler birlestigi, Ordabasydaǵy «Qajymuqan atyndaǵy oblystyq sport mýzeıi» kórmeleri uıymdastyrylady», deıdi oblystyq tarıhı-ólketaný mýzeıiniń ekskýrsııalyq-kópshilik bólimi meńgerýshisi Elzıra Saǵıtjanova.
QYZYLORDA