Almatydaǵy Qoǵamdyq kommýnıkasııalar ortalyǵy alańynda Táýelsiz baıqaýshylardyń aqparattyq shtabynyń alǵashqy brıfıngi ótti. Atalǵan shtab 15 naýryzda ótetin respýblıkalyq referendým aıasynda elimizdiń jańa Konstıtýsııasyn qabyldaý jónindegi jalpyhalyqtyq daýys berý úderisin ashyq ári ádil ótkizýge qoǵamdyq baqylaý jasaý maqsatynda qurylǵan.
Brıfıng barysynda shtab ókilderi onyń negizgi mindetteri men jumys tetikterin jan-jaqty tanystyrdy. Daýys berý kúni shtab tańnan bastap qorytyndy jarııalanǵanǵa deıin úzdiksiz jumys isteıdi. QKO bazasynda keńeıtilgen formatta áreket etetin sıtýasııalyq ortalyqta óńirlerden kelip túsetin aqparat jedel jınaqtalyp, saralanyp, buqaralyq aqparat quraldaryna der kezinde usynylmaq.
Shtab jumysynyń basty qaǵıdattary – ashyqtyq, beıtaraptyq jáne zań talaptaryn qatań saqtaý. Táýelsiz baıqaýshylar elimizdiń barlyq óńirinde daýys berý ýchaskelerindegi úderisti qadaǵalap, qoǵamdyq baqylaý tetikteri arqyly zańbuzýshylyqtardyń aldyn alýǵa jáne olardy jedel tirkeýge basymdyq beredi. Sonymen qatar quqyq qorǵaýshylar men sarapshylardyń qatysýymen tikeleı qosylymdar uıymdastyrylyp, referendým barysy týraly jan-jaqty aqparat beriledi.
Brıfıngte sóz sóılegen Independ.kz aqparattyq agenttiginiń bas redaktory Rafael Gasanov qoǵam úshin senimdi ári dáıekti aqparattyń mańyzyn atap ótti. Onyń aıtýynsha, referendým sekildi el taǵdyryna áser etetin tarıhı sátte aqparattyń ashyqtyǵy men jedeldigi asa mańyzdy.
«Qoǵamǵa dáıekti aqparat berý – mańyzdy. Qoǵamdyq kommýnıkasııalar ortalyǵymen tilshiler tyǵyz baılanys ornata otyryp, referendým barysynan resmı habar taratady. Búgingi kún – erkin monıtorıng jasap, úderisti paıymdy saralaı alatyn kezeń», dedi ol.
Al belgili medıamenedjer Nurjan Muhamedjanova bul naýqannyń el bolashaǵy úshin aıryqsha mánge ıe ekenin jetkizdi.
«Dál qazir – elimiz úshin mańyzdy kezeń. Memleketimizdiń aldaǵy bolashaǵyn aıqyndaıtyn qundy qujat qoǵam talqysyna usynyldy. Kózi ashyq árbir azamat saıası kóregendilik tanytyp, Ata Zańymyzdyń qabyldanýyna atsalysýǵa tıis. Biz osy referendýmnyń ádil ári ashyq ótýin qalaımyz. Táýelsiz jýrnalıster bastaǵan táýelsiz baıqaýshylar qoǵam senimin aqtaýǵa kúsh salady. Sol kúni Independ.kz portaly tikeleı efırde jumys isteıdi. Shetelden kelgen baıqaýshylarmen de tyǵyz baılanysta bolamyz. Basty maqsat – referendýmnyń ótý barysyn qadaǵalaý ári buqaraǵa naqty, shynaıy habar jetkizý», deıdi ol.
Sarapshylardyń pikirinshe, mundaı saıası naýqandarda halyqtyń saıası mádenıeti aıryqsha ról atqarady. Ásirese áleýmettik jeliler qarqyndy damyǵan kezeńde aqparattyń shynaıylyǵy men derekkóziniń senimdiligine mán berý – ár azamattyń jaýapkershiligi. Jalǵan nemese tekserilmegen málimetterdiń taralýy qoǵamdyq pikirge keri áser etýi múmkin. Sondyqtan shtab ókilderi azamattardy resmı jáne tekserilgen aqparatqa súıenýge, sanaly tańdaý jasaýǵa shaqyrdy.
Uıymdastyrýshylardyń málimdeýinshe, aqparattyq shtabtyń qyzmeti referendým kúnimen ǵana shektelmeıdi. Daýys berý qorytyndysy jarııalanǵanǵa deıin barlyq málimet saraptalyp, qoǵamǵa ashyq túrde usynylady. Bul bastama azamattyq qoǵam ınstıtýttarynyń belsendiligin arttyryp, qoǵamdyq baqylaý mádenıetin nyǵaıtýǵa yqpal etedi. Osylaısha, Táýelsiz baıqaýshylardyń aqparattyq shtaby referendým úderisiniń ashyqtyǵy men jarııalylyǵyn qamtamasyz etýge baǵyttalǵan mańyzdy alańǵa aınalmaq.
ALMATY