Qudaıbergen Jubanov atyndaǵy Aqtóbe óńirlik ýnıversıtetinde belgili lıngvıst ǵalym, qoǵam qaıratkeri, ult rýhanııaty men bilim salasynyń kórnekti ókili Muhtar Arynnyń 90 jyldyǵy atalyp ótti.
El bolashaǵyna qyzmet etken birtýar tulǵanyń ónegeli ómir joly, ǵylymı murasy, aǵartýshylyq qyzmeti týraly onyń kózin kórgen jandar, qyzmettesteri men stýdentteri esteliktermen bólisti. Muhtar Arynnyń elge sińirgen eńbegi ushan-teńiz edi. Qazaq KSR-i Joǵarǵy Keńesi HII shaqyrylymynyń depýtaty retinde táýelsiz elimizdiń Ata zańy, bilim týraly zańdarynyń qabyldanýyna úles qosty. Aqtóbede Tama Eset batyr Kókiuly, Eset Kótibaruly, Qazanǵap kúıshi kesenelerin turǵyzyp, Áıteke men Isataı batyr babalarymyzdyń esimderin aýdandarǵa berip, olardyń muralaryn jınastyrdy, tarıhı jer-sý ataýlaryn qaıtarýǵa úlken eńbek sińirdi. 1983–1995 jyldary Aqtóbe pedagogıkalyq ınstıtýtyn basqarǵan jyldary jańa ınnovasııalyq oqý tásilderin engizip, qazaq tilinde oqý toptaryn, alǵashqy etnopedagogıka kafedrasyn ashty. О́zi jazǵan «Bes anyq» atty oı-tolǵamdary kitabynda «naǵyz qazaq qandaı bolý kerek» degen úlgini usyndy.
«1983 jyly osy jaqqa rektor bolyp kelgende ınstıtýtta bir de bir qazaq bólimi bolmady. Bul elimiz egemendikke qol jetkize qoımasa da, onyń lebi sezile bastaǵan ýaqyt edi. Muhtar Ǵalıuly táýekelge baryp, ekonomıka, tarıh, fılologııa fakýltetterin ashty. Alǵash ashylǵan qazaq fılologııasy fakýltetine 50 stýdentti qabyldady. «Qazaq tili» qoǵamyn basqara júrip, qazaq mektepteri men balabaqshalarynyń ashylýyna sebepshi boldy. Ataqty ǵalym Rábıǵa Syzdyqtyń 70 jyldyǵyn Aqtóbede ótkizdi. Tahaýı Ahtanov, Qýandyq Shańǵytbaev kezdesýge keldi. Eset Kókiulynyń 325 jyldyǵyn, shaıyr Kerderi Ábýbákir, kúıshi Qazanǵap esimin ulyqtap, kesenelerin turǵyzdy, Nurpeıis Baıǵanın muralaryn jınastyrdy», deıdi fılologııa ǵylymdarynyń doktory Abat Pangereev.
Tutas óńirdiń ıdeologııalyq máselelerin sheshken rektordyń qyzmetin el-jurty umytpaýǵa tıis deıdi ardager jýrnalıst Idosh Asqar. Aqtóbe qalasynda qazaq mektepterin ashýdaǵy uıymdastyrýshylyq sheberligi, qarapaıymdylyǵy men kisiligi keıingilerge ónege bolýǵa tıis. Elge adal qyzmet etýdiń naǵyz úlgisin kórsetken adal azamatty Aqtóbe jurty umytpaıdy.
Aqtóbe oblysy