Oqýshylar ónerin shyńdaıtyn ortalyq

Qalanyń batys aýdanynda boı kótergen «Shabyt» balalar-jasóspirimder shyǵarmashylyq ortalyǵy Jezqazǵan jastarynyń qosymsha bilim alyp, jan-jaqty damýyna, bos ýaqy­tyn tıimdi ótkizýine arnalǵan ma­ńyzdy ortalyqtardyń birine aınal­maq. О́ndiristik tarıhy baı qala úshin bul jobanyń mańyzy erekshe. Sebebi balalardyń shyǵarmashylyq, zııatkerlik damýyna arnalǵan mundaı zamanaýı nysan Jezqazǵanda keıingi 70 jyldan astam ýaqyt ishinde al­ǵash ret salynyp otyr. Mańyzdy nysan­nyń ashylý saltanatyna Ulytaý obly­­sy men Jezqazǵan qalasynyń basshylyǵy, Bolat О́temuratov qory men «Vernyı Kapıtal» kompanııalar tobynyń ókilderi, Oqý-aǵartý mınıstrliginiń ókilderi, depýtattar, buqaralyq aqparat quraldarynyń ókilderi jáne qoǵam belsendileri qatysty.

Quny 4 mıllıard teńgeni quraı­tyn jobany Bolat О́temuratov qory júzege asyryp, ony Jezqaz­ǵan qa­lasyna tartý retinde tabystady. Saltanatty rásimde sóz sóı­legen Ulytaý oblysynyń ákimi Dastan Ryspekov:

«Jezqazǵan qalasyndaǵy jańa «Shabyt» balalar-jasós­pirimder shyǵarmashylyq ortalyǵy – jaı ǵana zamanaýı ǵımarat emes, balalardyń bilim alyp, óz qabiletterin damytyp, tehnologııa, shyǵarmashylyq jáne sportpen laıyqty jaǵdaıda aınalysýy­na múmkindik beredi. Memleket basshysy Qasym-Jomart Toqaev birneshe márte atap ótkendeı, árbir balanyń áleýetin damytý – eldiń strategııalyq basymdyǵy», dep qorǵa alǵys bildirip, jańa nysannyń qala úshin aıryqsha mańyzǵa ıe ekenin atap ótti.

Jalpy aýmaǵy 2 600 sharshy metr­­den asatyn keshende art-stýdııa, kúıdirý bólmesi bar qysh sheberhanasy, erte damytý ortalyǵy, jekpe-jek jáne horeografııa zaldary, fızıka, matematıka, jaratylystaný jáne robottehnıka kabınetteri ornalasqan STEM-aımaq, sıfrlyq óner men grafıkalyq dızaın stýdııa­sy, fotostýdııa, mýzyka synyptary, shahmat kabıneti jáne keń akt zaly qarastyrylǵan. «Shabyt» balalar-jasóspirimder shyǵarmashylyq ortalyǵynda barlyǵy 14 oqý kabıneti, qyzmetkerlerge arnalǵan jeke aımaqtar, medısınalyq kabınet pen kovorkıng bar. Ǵımarat bir ýaqytta 250 balaǵa deıin qabyldaýǵa laıyqtalǵan. Úıirmelerdegi sabaq­tar tegin ári birneshe aýysymmen ótkiziletindikten, ortalyq kúnine 600-ge deıin balany qamtı alady.

Aýmaǵy 1,6 gektardy quraıtyn keshende sport jáne oıyn alańdary bar, aınalasy abattandyrylǵan. Ǵımaratty jobalaý barysynda ınklıý­zıvti orta qalyptastyrýǵa erekshe kóńil bólindi. Munda erekshe bilim qajettiligi bar balalardyń kedergisiz kelýine barlyq jaǵdaı jasalǵan. Sondaı-aq sensorlyq bólme olardyń damýy men beıimdelýine yqpal etetin mańyzdy ortalyqtardyń birine aınalmaq.

«Bilim salasyn qoldaý jáne balalar men jastardyń jan-jaqty damýyna arnalǵan zamanaýı ınfraqurylym qalyptastyrý – Qor qyzmetiniń negizgi baǵytynyń biri. Biz mundaı jobalardy eldiń adam kapıtalyna salynǵan uzaqmerzimdi ınvestısııa dep bilemiz. Jezqazǵandaǵy jańa «Shabyt» balalar-jasóspirimder shyǵarmashylyq ortalyǵy óńir balalarynyń sapaly qosymsha bilim alyp, shyǵarmashylyq ári kásibı turǵydan damýyna tyń serpin beredi dep senemin», dedi Bolat О́temuratov qory qamqorshylar keńesiniń tóra­ǵasy Almaz Sharman.

«Jobany júzege asyrý barysynda qurylys sapasyna, zamanaýı sheshimderdi engizýge jáne balalar úshin jaıly ári qaýipsiz orta qalyptastyrýǵa erekshe mán berildi. Biz úshin bıznestiń tabysy ekonomıkalyq kórsetkishtermen ǵana emes, qoǵamǵa tıgizgen naqty paıdasymen de ólshenedi. Sondyqtan bilim men óskeleń urpaqtyń damýyna baǵyttalǵan bastamalardy qoldaý – bizdiń bas­ty qundylyqtarymyzdyń biri. Jańa «Shabyt» balalar-jas­óspirimder shyǵarmashylyq orta­ly­ǵy balalardyń bilim alyp, shy­ǵar­mashylyǵyn shyńdap, dostyq qarym-qatynas ornatatyn ári jańa múmkindikterge jol ashatyn mańyzdy ortalyqqa aınalady dep senemin», dedi «Vernyı Kapıtal» kompanııalar tobynyń bas dırektory Aıdan Aqanov.

Bolat О́temuratov qory 12 jyl ishinde elimizdiń ár óńirinde mańyzdy nysandardyń salynýyna uıytqy boldy. Olardyń qatarynda Esik pen Qosshy qalalaryndaǵy mektepter, Qyzylordadaǵy jańa áýejaı, Qosshydaǵy komıýnıtı-ortalyq bar. Bul jobalardyń barlyǵyn biriktiretin ortaq maqsat – halyqtyń ómir sapasyn jaqsartyp, óńirlerdiń turaqty damýyna úles qosý.

Ulytaý oblysy