Ulytaý oblysynyń Sátbaev qalasynda ornalasqan «Iýnost» stadıonynda vandalızm jasaǵan balalar anyqtaldy. Áleýmettik jelide taraǵan beınejazbada birneshe balanyń stadıondaǵy oryndyqtardy syndyryp jatqan sáti kórsetilgen, dep habarlaıdy Egemen.kz.
Oqıǵaǵa baılanysty polısııa vandalızm deregi boıynsha qylmystyq is qozǵady. Tártip saqshylary quqyq buzýshylyqqa qatysy bar eki balany taýyp, olardyń ata-analarynyń qatysýymen túsindirý jumystaryn júrgizdi.
Polısııa málimetinshe, balalardy tárbıeleý mindetterin tıisinshe oryndamaǵany úshin ata-analarǵa qatysty ákimshilik is qozǵaldy. Sonymen qatar olar keltirilgen materıaldyq shyǵyndy óteýge mindetteledi.
Quqyq qorǵaý organdary jazǵy demalys kezinde ata-analardy balalardyń bos ýaqytyn baqylap, olardyń tártibine erekshe nazar aýdarýǵa shaqyrdy.
Eske salaıyq, jýyrda Prezıdent Qasym-Jomart Toqaev Ybyqty saı shatqalyndaǵy vandalızm oqıǵasy boıynsha qatań qorytyndy shyǵarý kerektigin aıtqan bolatyn.