Almatyda 32 jastaǵy júkti áıel shuǵyl otadan soń kóz jumdy. Dárigerler kesar tiligimen náresteni aman saqtap qalýǵa tyrysqanymen, kóp uzamaı ekeýi de baqılyq bolǵan, dep habarlaıdy Egemen.kz.
Týystarynyń aıtýynsha, Anna Efımenko júktilik kezinde turaqty tekserýden ótip turǵandyqtan, ana men bala densaýlyǵyna qaýip tóndiretin eleýli másele anyqtalmaǵan. Áıeldiń jaǵdaıy nasharlaǵan soń ol aldymen №2 qalalyq aýrýhanaǵa, keıin №5 qalalyq aýrýhanaǵa aýystyrylǵan.
«Oǵan deıin bári qalypty boldy. Dárigerler tekserip, balanyń jaǵdaıyn baqylap otyrdy. Eshqandaı qaýip baıqalmady. Al №2 perzenthanada jarty saǵattyń ishinde úlken ábiger bastalyp, dárigerler júgirip, telefon soǵa bastady», deıdi marqumnyń jubaıy Alekseı Efımenko.
Dárigerler shuǵyl kesar tiligin jasaý týraly sheshim qabyldaǵan. Alaıda sábıdi aman alyp qalý múmkin bolmady. Operasııadan bir táýlik ótken soń Anna Efımenkonyń ózi de qaıtys boldy.
Marqumnyń ápkesi Alena Gradovıch jańa týǵan náresteniń ólimine qatysty da túsiniksiz jaıttar bar ekenin aıtty.
«Balanyń qaıtys bolǵanyn biz tek 5 mamyr kúni keshki saǵat alty shamasynda bildik. Al medısınalyq qujatta náresteniń 5 mamyr kúni saǵat 08:12-de kóz jumǵany kórsetilgen. О́lim sebebi retinde gıpoksııa jazylǵan, al aýyzsha sóıleskende bizge asfıksııa týraly aıtylǵan edi», dedi ol.
Almaty qalalyq Qoǵamdyq densaýlyq saqtaý basqarmasy sot-medısınalyq saraptama aıaqtalǵanǵa deıin oqıǵanyń egjeı-tegjeıi jarııalanbaıtynyn habarlady.
Almatydaǵy №1 perzenthana aqyry súrilip tyndy
Qazirgi ýaqytta atalǵan jaıtqa baılanysty Medısınalyq jáne farmasevtıkalyq baqylaý komıtetiniń departamenti tekserý júrgizip jatyr.
Eske sala keteıik, buǵan deıin Almatyda ana ólimin tıisti organdarǵa ýaqtyly habar bermegen medısınalyq uıymǵa ákimshilik aıyppul salynǵan edi.