Petropavl qalasynda jasóspirimge shabýyl jasaǵany úshin sottalǵan jergilikti turǵynǵa qatysty úkim apellıasııalyq tártippen qaıta qaralady. Sot otyrysy 9 maýsymǵa belgilenip otyr, dep habarlaıdy Egemen.kz.
Qalalyq sot 20 sáýirde qarýmen shabýyl jasaǵan er adamǵa qatysty úkim shyǵarǵan. Oǵan ortasha qaýipsizdik mekemesinde 5 jyl bas bostandyǵynan aıyrý jazasy taǵaıyndalǵan.
Is materıaldaryna sáıkes, oqıǵa 2025 jylǵy 22 qarashada bolǵan. Er adam Instagram jelisinen óziniń qatysýymen túsirilgen beınerolıkti kórgen. Vıdeoda onyń ıtterdi dóreki ári agressıvti túrde úıretip jatqany kórsetilgen. Jazba astynda áleýmettik jeli qoldanýshylary balaǵat sózder men qorlaıtyn pikirler qaldyrǵan.
Jasóspirimder tragedııasy qoǵamdy oılandyryp tur
Sottalýshy atalǵan jarııalanymǵa beıtanys jasóspirimniń qatysy bar dep oılaǵan.
Sot qaýlysynda kórsetilgendeı, mas kúıde bolǵan er adam aýlaǵa shyǵyp, sol jerde júrgen eki kámeletke tolmaǵan balanyń birine shabýyl jasaǵan.
«Er adam jábirlenýshini qulatyp, betine pyshaqqa uqsas zatty taqap, oń jaq bet tusyna jaraqat salǵan. Jasóspirimder qarsylyq kórsetip, qashyp qutylǵan», delingen qujatta.
Sottalýshy óz kinásin ishinara moıyndady. Onyń aıtýynsha, ol kesetin zatty ózin qorǵaý maqsatynda alǵan, al jasóspirimdi abaısyzda jaraqattap alǵanyn málimdegen.
Qorǵaýshy tarap onyń áreketin densaýlyqqa jeńil zııan keltirý babyna qaıta saralaýdy surady.
Alaıda sot bul ýájdermen kelispeı, er adamdy naqty merzimge bas bostandyǵynan aıyrý jazasyna kesti.
Atyraýda jasóspirimder 14 jastaǵy oqýshyny birneshe saǵat boıy uryp-soqqan