Shymkent qalasynda zańsyz medısınalyq qyzmet kórsetip, blefaroplastıka operasııasyn jasaǵan áıelge qatysty sot prosesi ótti. Operasııadan keıin pasıenttiń bir kózi kórmeı qalǵan, dep habarlaıdy Egemen.kz.
Is materıaldaryna sáıkes, aıyptalýshynyń medısınalyq qyzmetpen aınalysýǵa lısenzııasy da, tıisti sertıfıkaty da bolmaǵan. Soǵan qaramastan ol ózin maman retinde tanystyryp, tómengi qabaqqa blefaroplastıka jasaıtynyn aıtqan. Operasııa úshin ol pasıentten 100 myń teńge alǵan. Buǵan deıin jábirlenýshi onyń kómegine júginip, qulaq qalqanyn túzetý (otoplastıka) operasııasyn da jasatqan.
«2025 jyldyń sáýir aıynda ol alǵash ret medısınalyq klınıkaǵa baryp, aıyptalýshymen jeke tanysqan. Áńgime barysynda ol aıyptalýshyda dıplom men tıisti sertıfıkattardyń bar-joǵyn suraǵan. Buǵan jaýap retinde aıyptalýshy aýyzsha túrde óziniń joǵary medısınalyq bilimi men qajetti sertıfıkattary bar ekenin aıtqan», delingen sot habarlamasynda.
Eks-depýtatqa kosmetıkalyq ota jasaǵan klınıkadan zańbuzýshylyqtar anyqtaldy
Tekserý nátıjesinde aıyptalýshy óz kinásin moıyndady. Sondaı-aq ol kámeletke tolmaǵan eki balasy bar ekenin aıtyp, jeńil jaza surady. Sot ony 1,5 jyl bas bostandyǵynan aıyryp, medısınalyq qyzmetpen aınalysýǵa 3 jylǵa tyıym saldy. Sondaı-aq kinálige 5 mln teńge moraldyq ótemaqy jáne 369 myń teńge emdelý shyǵyndaryn óteý mindetteldi.
Eske sala keteıik, buǵan deıin Almatydaǵy jeke klınıkada lıposaksııadan keıin bloger ári kásipker Sáýle Ermahanova qaıtys bolǵan edi.