Memleket basshysy bıylǵy jyldyń Qazaqstan úshin aýqymdy ózgeristerge toly ekenin jáne elimizdiń ornyqty damýdyń dańǵyl jolyna túskenin málimdedi, dep habarlaıdy Egemen.kz.
«Biz bıyl Táýelsizdiktiń 35 jyldyǵyn atap ótemiz. Bul tarıhı kezeń júrip ótken jolymyzdy jan-jaqty tereń taldaýdy jáne bolashaqqa strategııalyq jospar qurýdy muqııat oılastyrý turǵysynan úlken mánge ıe. Atalǵan mereıli datany qajyrly eńbekpen jáne naqty nátıjelermen qarsy alýymyz kerek. Bıyl tutas elimiz úshin aýqymdy ózgeristerge toly jyl bolyp otyr», dedi Qasym-Jomart Toqaev.
Prezıdent Memlekettik tý kóterý rásimine qatysty
Sonymen qatar Prezıdent Ata zańnyń memleket damýy úshin aıryqsha mańyzǵa ıe ekenin aıtty.
«Jalpyhalyqtyq referendýmda qabyldanǵan Konstıtýsııa – Qazaqstannyń aldaǵy ondaǵan jyldarǵa arnalǵan basty zańy. Dál osy Ata zań halqymyzdy álemdik órkenıettiń jańa belesterine bastaıdy. Tehnologııalyq jetistikter, saıası dúrbeleńder, áskerı qaqtyǵystar beleń alyp jatqan qazirgi dáýirde Negizgi zańymyzdyń jol nusqaýshy temirqazyq retindegi mańyzy eselene túsedi. Elimizdiń bas qujaty – Konstıtýsııa 1 shildeden bastap kúshine enedi. Tamyz aıynda bir palataly Quryltaı saılaýy ótedi, al qyrkúıekte Qazaqstan Halyq Keńesi qurylady. Osylaısha, biz aýqymdy ózgerister kezeńine aıaq basamyz. Qazirdiń ózinde halqymyzdyń bolmysy, qundylyqtary, sana-sezimi, tipti, dúnıetanymy ózgerip jatyr. Azamattarymyzdyń basym kópshiligi zańǵa qurmetpen qaraý, qoǵamdyq tártipti nyǵaıtý strategııasyn qoldaıdy, sondaı-aq «Taza Qazaqstan» aksııasyna belsene qatysady», dedi Memleket basshysy.
Eske sala keteıik, búgin elimizde Memlekettik rámizder kúni atalyp ótip jatyr. Elimizdiń táýelsizdigi men egemendigin aıqyndaıtyn rámizder 1992 jylǵy 4 maýsymda resmı túrde bekitildi.