«Asyl qazyna» federasııasy uıymdastyrǵan respýblıkalyq tazylar týrnırinen Shet aýdanynyń Kókqasqasy kóptiń kózaıymyna aınalyp, «Eń sulý tazy» atalymyn ıelenip keldi.
Áıgili Kókqasqanyń ıesi – Qýanysh Sovetov. Ol bala kezinen beri ıt júgirtip, ań aýlaıdy.
– Shyny kerek, mundaı jarysqa qatysyp qana qoımaı, odan oljaly bolý – biz úshin zor maqtanysh! Qýanyshymda shek joq! Kileń júırik tazylardyń arasynda Kókqasqam sulýlyǵymen kózge tústi. Júırigim til-kózden aman bolsyn, – deıdi Qýanysh Sovetov.
«Asyl qazyna» federasııanyń bas tóreshisi Eldos Kárimjanov halqymyz úshin asa qasterli asyl tuqymdy ıtterge zor kóńil bólinip jatqany úlken qýanysh deıdi.
– Osyndaı jarystar joǵary deńgeıde ótip jatqany qýantady. Basqa oblystarda tek aımaqtyq deńgeıde jarystar uıymdastyrylady. Oǵan tek 30-40 tazy ǵana qatysady. Al Qaraǵandy oblysynda áýeli aýdandyq deńgeıde irikteý ótkizedi. Sosyn baryp oblystyq deńgeıde úzdikter anyqtalady. Munda tazy ıtterdiń sany júz elýden asady. Sol sebepti de qaraǵandylyq saıatshylardyń eńbegin joǵary baǵalaıtynymdy atap ótkim keledi, – deıdi bas tóreshisi.
Eldos Kárimjanov «Asyl qazyna» federasııasymen birge halyqaralyq kınologııa federasııasynyń (FCI) bas komıtetine qazaqtyń tazy ıtin (Kazakh Tazy) resmı ıt tuqymy etip tirketý úshin kúsh salyp júr.
«Qaraǵandy oblysynyń qumaı tazy jáne tóbet ıtter federasııasy» qoǵamdyq birlestiginiń basshysy Janbolat Omar mundaı týrnırler arqyly basqa óńirdiń saıatshylarymen tyǵyz baılanys ornata alamyz deıdi.
– Biz bıyl júldeli orynǵa ilige almadyq. Degenmen, mol tájirıbe aldyq. Aımaǵymyzdyń tazysy «Eń sulý tazy» dep moıyndalyp jatyr. Osynyń ózi biz úshin úlken jetistik. Nurdáýlet Myrzaqanovpen birge 2018 jyldan beri «Asyl qazyna» respýblıkalyq tazy federasııasynyń túrli týrnırlerine qatysyp kelemiz. Biz úshin eń bastysy – elimizdiń tájirıbeli ıtbegilerimen qarym-qatynas ornatý, – deıdi ol.
Bul dodaǵa Qarqaralynyń Basar degen tazysy da qatysqan edi. О́kinishke qaraı, dodanyń bul júldesi tek bireýine ǵana buıyrý kerek degen sharty bar eken.
2018 jyly ótken «Asyl qazyna» tazy federasııasynyń respýblıkalyq alǵashqy jarysynda Qaraǵandydan barǵan Saryqasqa atty tazy birinshi oryndy ıelengen edi.
Qaraǵandy oblysy