Bıyl qazaqtyń bas aqyny Abaıdyń 180 jyldyǵyna arnalǵan elimizde merekelik sharalar uıymdastyrylýda. Abaı oblysynyń Kókpekti aýdanynda mereıtoı aıasynda «Kórkeıgen ólke – Kókpekti» atty sport jáne mádenıet festıvali ótti, dep jazady Egemen.kz.
Is-sharaǵa Qazaqstan Respýblıkasy Parlament Májilisiniń depýtaty Nurtaı Sabılıanov, Abaı oblysynyń mádenıet, tilderdi damytý jáne arhıv isi basqarmasynyń basshysy Janjigit Omarhan, «Amanat» partııasy Abaı oblystyq fılıalynyń tóraǵasy Aıdar Sadyrbaev jáne basqa da qoǵam belsendileri qatysty.
Ulttyq rýh pen óner toǵysqan festıval barysynda «Tolaǵaı tulpary» atty 80 shaqyrymdyq uly alaman, alaman báıge, top báıge, taı jarys, komandalyq kókpar oıyndary syndy ulttyq sport túrlerinen jarystar uıymdastyryldy. Dúbirli dodaǵa elimizdiń túkpir-túkpirinen baby kelisken kil júırik 174 tulpar (uly alaman – 61 júırik, taı jarysy 42 júırik, top báıge 38 júırik, alaman – 33 júırik) qatysty.
Uly aqyn toıyna «Kókpekti» aýyl sharýashylyq qory tartý jasap, Abaı aýdanyna «Chevrolet Monza» avtokóliginiń kiltin tabystady.
Aýqymdy shara estrada juldyzdarynyń qatysýymen ótken gala-konsertpen qorytyndylandy. Jalpy is-sharaǵa 10 myńnan astam kórermen qatysty.
Aıta keteıik, festıval barysynda ótken sporttyq dodalardyń júlde qory bas júldege berilgen 3 avtokólikten bólek, 15 mln teńge kóleminde aqshalaı syılyqty qurady.