Jambyl oblysy qylmystyq ister jónindegi mamandandyrylǵan aýdanaralyq soty bankır Erjan Tátishevtiń ólimine qatysty qylmystyq is boıynsha úkim shyǵardy, dep habarlaıdy «QazAqparat».
Sotqa tóraǵalyq etken Azamat Tilepov úkimniń mátinin oqydy. Oǵan sáıkes, bıznesmen, buryn uıymdasqan qylmystyq top basshysy bolǵan, 2004 jyly bankır Erjan Tátishevti óltirdi dep aıyptalǵan Murathan Toqmádı 10 jyl 6 aıǵa bas bostandyǵynan aıyryldy. Osy merzimge 2017 jyly Almaty qalasy Almaly aýdandyq soty shyǵarǵan úkimniń merzimi de kiredi. M. Toqmádı jazany qaýipsizdigi barynsha kúsheıtilgen mekemede óteıtin boldy.
Sotta tóraǵalyq etken sýdıa sottalýshydan «osy úkimge kelisesiz be» degen suraǵyna Toqmádı kelisetinin aıtyp jaýap berdi. Sýdıa Azamat Tilepovtyń aıtýynsha, qazirgi qoldanystaǵy zańnama boıynsha aıyptalýshynyń kináni moıyndaǵany úshin ǵana úkim shyǵarylmaıdy.
«Sot prosessi barysynda sottalýshynyń, kýágerlerdiń, sarapshylardyń qatysýymen jaýap alý men tergeý amaldary kezindegi vıdeojazbalar kórsetilip, prosesstiń barlyq qatysýshylary tyńdaldy. 2004 jyly jasalǵan qylmystyń motıvi men jaǵdaılary boıynsha tolyq dálelder keltirildi. Kýágerlerdiń jaýaptary arqyly sottalýshy M.Toqmádı, óltirilgen bankır E.Tátishev, UQK-niń burynǵy basshysy N.Dútbaev pen óltirýge tapsyrys bergen M.Ábilázovtyń arasyndaǵy qarym-qatynastyń sulbasy jasaldy», - dedi ol. Sottalýshynyń prosessýaldyq kelisimi men ony M.Toqmádıdiń tolyq oryndaýyna baılanysty zańnamalyq turǵyda jumsaqtyq kórsetý, Azamat Tilepovtyń aıtýynsha, «sot barysynda sottalýshy men kýágerlerden jaýap alý kezinde anyqtalǵan adam sottalǵan kezde ǵana oryndalady».