Nur-Sultan qalasynyń №2 arnaıy mektebiniń balalary bilim berý oshaǵynyń aýlasynda aǵash kóshetterin otyrǵyzdy. Is-shara "Týǵan jer" ekologııalyq qozǵalysynyń "Ár balaǵa – óz aǵashy" jobasy aıasynda jáne Memleket basshysynyń eldi jasyldandyrý tapsyrmasy negizinde uıymdastyryldy, dep habarlaıdy Egemen.kz.
"Biz balalarmen birge tek kóshet otyrǵyzýdy emes, ony ósirýdi de úırendik. Búgin qondyryp jatqan kóshetterimiz ózimizdiń tálimbaqta ósken shaǵan, emen aǵashtary. Negizi kóbine qysta qustardy azyqtandyrýǵa bolatyn alma, almurt, dolana, moıyl egýge tyrysamyz",- dedi "Týǵan jer" ekologııalyq balalar qozǵalysynyń jetekshisi Tatıana Korshýnova.
Jalpy ekologııalyq jobaǵa 15 orta jáne korreksııalyq mektepterden 300-ge jýyq oqýshy jumyldyrylǵan. Ár qalanyń bilim berý oshaqtary kóshet egýdi bir-birine dástúrli túrde estafeta retinde joldaıdy.
"Ekologııalyq mádenıet bizdi biriktirýshi faktor bolýy kerek dep oılaımyn. Qorshaǵan ortany jasyldandyrýǵa áleýmettik statýsyna, densaýlyǵyna qaramastan ár bala úles qosa alady", - dep esepteıdi T. Korshýnova.
Keler kóktemde balalar baqsha jáne bólme gúlderin otyrǵyzbaq.
Eske salsaq, Memleket basshysy 1 qyrkúıektegi joldaýynda aldaǵy 5 jylda orman alqaptarynda 2 mlrd, eldi mekenderde 15 mln aǵash otyrǵyzýǵa tapsyrma bergen.