Elorda ákimdiginde qala ákiminiń orynbasary Baqtııar Mákenniń tóraǵalyǵymen «Vaksınasııa – COVID-19-syz ómir súrý joly» taqyrybynda dóńgelek ústel ótti. Is-sharaǵa qalanyń medısınalyq mekemeleriniń basshylary, úkimettik emes uıymdardyń, memlekettik mekemelerdiń ókilderi qatysty, dep habarlaıdy Egemen.kz Nur-Sultan ákimdiginiń resmı saıtyna silteme jasap.
Dóńgelek ústel onlaın rejımde ótti.
Qatysýshylar elordadaǵy qazirgi epıdemıologııalyq jaǵdaıdy, sondaı-aq koronavırýstyń taralýynyń aldyn alý sharalaryn jáne halyqty jappaı vaksınasııalaý jumystaryn talqylady.
Olar bir jyldan beri qaýipti vırýspen damylsyz kúresip kele jatqan dárigerlerdiń jumysyna erekshe nazar aýdardy.
Baqtııar Máken atap ótkendeı, búgingi kúni qalada kún saıyn orta eseppen 300-600 KVI jaǵdaıy tirkeledi. Salystyrmaly túrde alsaq, ótken jyldyń shildesinde bul sıfr 180-200 bolatyn. Epıdemıologııalyq jaǵdaıdy baǵalaý boıynsha Nur-Sultan bir aıdan astam ýaqyt «qyzyl aımaqta» tur.
«Vaksınasııa — bul aldyn-alýdyń basty sharasy. Sol sebepti ony qoldanýdyń paıdasy yqtımal qaýipterden edáýir asyp túsedi. Memleket basshysy Q.K. Toqaev óz sózinde KVI-men kúrestegi jalǵyz senimdi sheshim vaksınasııa ekenin aıtty. Bul lokdaýndardan shyǵý strategııasyn aldyn-ala oılastyrǵan elderdiń mysalymen dáleldendi. Qazir olardyń ekonomıkalary men azamattardyń kúndelikti ómiri pandemııalyq qıyndyqtardy sezinbeıdi. Qazirgi ýaqytta halyqty vaksınasııalaý koronavırýstyq ınfeksııamen kúrestegi mańyzdy kezeń bolyp sanalady. Ujymdyq ımmýnıtetti qalyptastyrý úshin biz 650 myńnan astam adamdy nemese qala halqynyń 60%-yn vaksınasııalaýymyz kerek», dep atap ótti ákim orynbasary.
Ol búginde elordada 100 myńnan astam adam vaksınanyń birinshi komponentin, al 16 myńnan astamy vaksınanyń eki komponentin alǵanyn eske saldy.
Sonymen qatar Baqtııar Máken medısına qyzmetkerleriniń koronavırýspen kúreste óz densaýlyǵyn qaterge tigip, naýqastardy emdep shyǵarý jolynda atqaryp jatqan eńbegin aıryqsha atap ótti.
«Búginde elordalyq dárigerler men medısınanyń ózge de qyzmetkerleri eki ese júktememen jumys istep jatyr. Koronavırýspen kúreske tórt myńnan astam medısına qyzmetkeri jumyldyryldy. Dárigerler men qalanyń barlyq medısınalyq qyzmetkeri bir jyldan astam ýaqyt damylsyz jumys istep keledi. Aq halatty mamandardyń eńbegin baǵalap, keńesteri men usynystaryna qulaq asýymyz kerek. Bizdiń aldymyzda ujymdyq ımmýnıtetti qalyptastyrýdyń jalpy mindeti tur. Azamattyq qoǵam elordamyzda bolyp jatqan áleýmettik, qoǵamdyq máselelerde shet qalmaýy tıis. Qazir azamattyq qoǵamnyń vaksınasııa máselelerindegi belsendiligi mańyzdy. О́zderińiz biletindeı, bastapqyda jurt vaksınasııaǵa asa saqtyqpen qaraǵan bolatyn. Biraq vaksınadan bas tartý densaýlyqqa qaýipti ekenin túsingennen keıin vaksınasııalanǵandardyń qatary tola bastady», dep túıindedi B.Máken.
Ol kezdesýge qatysýshylardy KVI-ge qarsy vaksınasııanyń mańyzdylyǵy týraly azamattardy túsindirý jáne aqparattandyrý jumysynda belsendilik tanytýǵa, qalypty ómirge oralý úshin, sol sııaqty bir jyldan astam ýaqyt otbasylarynan jyraqta, demalyssyz kele jatqan medısına qyzmetkerleriniń jumysyn jeńildetip, qalanyń densaýlyq saqtaý júıesin jeńildetýge shaqyrdy.
Dóńgelek ústelge qatysýshylar arasynda V shaqyrylǵan Qazaqstan Respýblıkasy Parlamenti Májilisiniń Áleýmettik-mádenı damý komıtetiniń múshesi Nadejda Petýhova, «Ulttyq ǵylymı medısınalyq ortalyq» AQ Basqarma tóraǵasy, medısına ǵylymdarynyń doktory Abaı Baıgenjın, Nur-Sultan qalasy ákimdiginiń «Kópbeıindi medısınalyq ortalyq» ShJQ MKK dırektorynyń orynbasary Sáýle Atyǵaeva, Nur-Sultan qalalyq ftızıopýlmonologııa ortalyǵynyń dırektory Anna Sepke jáne t.b. boldy.