Kólikke arnalǵan jolda elektrosamokatpen júrýge tyıym salynǵan. Bul týraly Ortalyq kommýnıkasılar qyzmetinde ótken halyq aldyndaǵy esep berý kezdesýi kezinde Ishki ister mınıstri Erlan Turǵymbaev aıtty, dep habarlaıdy Egemen.kz.
Onyń aıtýynsha, elektrosamokattar Ishki ister organynyń ǵana emes, barlyq memlekettiń bas aýrýyna aınaldy. Olardyń paıda bolǵanyna kóp ýaqyt óte qoıǵan joq jáne samokattardyń jyldamdyqtarynyń tehnıkalyq sıpaty da ár túrli.
«Búgingi kúni saǵatyna 80 shaqyrym jyldamdyqpen júrýge qaýqarly samokattar da bar. Alaıda zańnamaǵa sáıkes, olar jol kólik qozǵalysynyń qatysýshylary bolyp sanalmaıdy. Iаǵnı jol kólik erejisinde ondaı transport joq. О́ıtkeni olar kólik normalaryna sáıkes kelmeıdi, artqy, shetki kólik qozǵalysyn baqylaýǵa múmkindik beretin aınalarmen jabdyqtalmaǵan, dóńgelekteriniń dıametri, tejegishterine qatysty sertıfıkattalǵan tehnıkalyq sıpattama joq», dedi mınıstr.
Sondyqtan elektrosamokattarǵa kólik qozǵalysyna arnalǵan jolmen júrýge tyıym salynady. Jáne mundaı jaǵdaı oryn alsa onyń ıesi ákimshilik jaýapkershilikke tartylady.
Mınıstrdiń aıtýynsha, olarǵa velosıpedke arnalǵan jolmen jáne tortýarlarmen júrýge ruqsat berý máselesi qarastyrylýda. Qazir osy maqsatta jumys toby quryldy.