QR Qarjy mınıstrligi Memlekettik kirister komıteti 30 qyrkúıekke deıin Qazaqstan aýmaǵynan qandaı kólikterdiń shyǵarylýy kerektigin aıtty, dep habarlaıdy Egemen.kz.
Komıtet usynǵan málimet boıynsha, atalǵan talaptyń Eýrazııalyq ekonomıkalyq odaqqa múshe elderdiń memlekettik nómiri bar kólikterge qatysy joq.
«Qazaqstan azamattaryna Eýrazııalyq ekonomıkalyq odaq aýmaǵynda Belarýs Respýblıkasy men Reseı Federasııasynyń kólik quraldarymen ýaqytsha ákelý merzimderin esepke almastan júrýge bolady. Al Armenııa Respýblıkasy men Qyrǵyz Respýblıkasynyń kólik quraldarymen senimhat boıynsha basqarý quqyǵynsyz júre alady», dep jazylǵan komıtettiń túsindirmesinde.
Sheteldik kólik quraldaryn áketý týraly talap Eýrazııalyq ekonomıkalyq odaq elderiniń búkil aýmaǵyna qoldanylady. Iаǵnı, sheteldik kólik Eýrazııalyq ekonomıkalyq odaq aýmaǵynan tys aýmaqqa shyǵarylýy kerek.
«Shetel azamattary óziniń turǵylyqty eline jáne kólikti áketetin elge qaıtarý úshin memlekettik shekaradan atalmysh kólikti minip óte alady. Eger ol múmkin bolmasa, tasymaldaýshylardyń qyzmetin paıdalana alady», dep jazady komıtet mamandary.
Odaq aýmaǵyna úshinshi elderden ákelingen kólikti tıisti kedendik rásimdeýsiz bir jyl ǵana júrgizýge ruqsat berý týraly sheshimdi Eýrazııalyq ekonomıkalyq keńes 2020 jylǵy 29 sáýirde shyǵarǵan bolatyn. Bul kezde pandemııa órship, shekaralar jabyq bolǵandyqtan, merzim 2021 jyldyń 30 qyrkúıegine deıin uzartylǵan edi. Bul merzim bitkennen keıin Ákimshilik polısııa komıteti men Memlekettik kirister komıtetiniń qyzmetkerleri birlesip ýaqytsha júrý merzimi aıaqtalǵan kólikterdi izdestiretin bolady. Ondaı kólikter tabylǵan jaǵdaıda aıyp turaǵyna qamalady.
«Eýrazııalyq ekonomıkalyq odaqtyń qoldanystaǵy zańnamasy boıynsha ýaqytsha ákelý merzimderi ótkennen keıin jeke tulǵada kedendik tólemderdi tóleý mindetteri týyndaıdy. Tólemniń mólsherin aýmaqtyq memlekettik kirister organdarynyń qyzmetkerleri esepteıdi», dep jazylǵan komıtettiń málimetinde.