Eýrazııa medıaforýmy uıymdastyrý komıtetiniń tóraǵasy Darıǵa Nazarbaeva XVII forýmnyń ashylý saltanatyn ótkizdi, dep habarlaıdy Egemen.kz.
«Bıyl bizdiń elimiz úshin erekshe mánge ıe – QR Táýelsizdiginiń 30 jyldyǵy ótedi. Táýelsizdiktiń 30 jyly – bul beıbitshiliktiń 30 jyly, jasampazdyqtyń 30 jyly jáne zamanaýı memlekettilik pen azamattyq qoǵam ınstıtýttaryn qurýdyń 30 jyly. 30 jyl buryn Keńes Odaǵynyń ydyraýy jańa táýelsiz memleketterdiń qurylýyna ákeldi. Bul jyldary baýyrlas respýblıkalardaǵy ómir ár túrli ótti. Bir qaraǵanda, keıbir jalpy zańdylyqtardy bólip kórsetý ońaı emes, bastapqy pozısııalarda da, odan keıingi vektorlar men damý qarqynynda da úlken aıyrmashylyqtar bar. Biraq sońǵy 30 jyldyń tarıhy turaqty, saıası, áleýmettik, ekonomıkalyq júıeler, saıası jáne azamattyq mádenıet pen damý traektorııasy áli qalyptaspaǵan damýshy álemde memleket basshysynyń erkine, Ult kóshbasshysyna jáne ulttyń óz erik-jigerine óte táýeldi ekenin dáleldedi dep sanaımyn», dedi Darıǵa Nazarbaeva XVII Eýrazııa medıaforýmynyń ashylýynda.
«Ár túrli saıası júıelerdiń artyqshylyqtary týraly teorııalyq pikirtalasqa qatysýǵa bolady, tarıhtyń damýy týraly paıymdaýǵa bolady. Iá, bastapqy jaǵdaılar, tabıǵı resýrstar úlken ról atqarady, biraq eń basty róldi – kóshbasshynyń tulǵasy, eldiń álemdegi orny men onyń bolashaǵy týraly kózqarasy alady. Qazaqstan bul turǵyda Tuńǵysh Prezıdent – Elbasy Nursultan Nazarbaevtyń arqasynda aıryqsha oryn alady. Elbasynyń basshylyǵymen bizdiń elimiz qysqa tarıhı kezeńde shynaıy táýelsizdikke, memlekettik egemendikke qol jetkizýdiń, tolyqqandy qazirgi zamanǵy ekonomıka men serpindi damyp kele jatqan áleýmettik salany qurý jolynan ótti. Bul ońaıǵa soqpaıtyn kúrdeli jol. Bizdiń elimiz sol jolda barlyq qıyndyqtar men problemalardy túsine otyryp, alǵa damyp keledi. О́ıtkeni, ózderińizge belgili, joldy júrgen adam ǵana eńseredi», dedi ol.
Onyń aıtýynsha, búgingi Qazaqstan – álemdik saıasatta da, Ortalyq Azııa óńirinde de belsendi ustanymy bar memleket.
«Sońǵy 30 jylda Qazaqstan óńirdegi beıbitshilik pen qaýipsizdikke jaýapty memleket retinde tanylyp keledi. Qıyn sátte biz árdaıym baýyrlas respýblıkalarǵa kómekke keldik, azyq-túlik, astyq, otyn, tehnıkany bólistik. Aýǵanstanda bolyp jatqan úderister bárimizdi alańdatady. Aýǵandyq retteý, osy eldiń beıbit damýy taqyryby birneshe ret bizdiń forýmnyń basty nazarynda boldy», deıdi D. Nazarbaeva.
Darıǵa Nazarbaeva qazirgi Eýrazııalyq medıaforýmnyń dıalog pen ózara túsinistiktiń mańyzdy alańyna aınalatynyna senim bildirdi.
«Aýǵanstannyń qaıǵyly mysaly kórsetkendeı, qandaı jaqsy nıetpen jasyrsa da, baqyt pen órkendeýdi sheteldik naızamen alyp kelý múmkin emes», dedi D. Nazarbaeva.