Qasym-Jomart Toqaev: Bizdiń maqsatymyz – ınnovasııalardy damytý

Memleket basshysy búgingi otyrys halyqaralyq ahýaldyń shıelenisken jaǵdaıynda ótip jatqanyn atap ótti.

– Jahandyq logıstıka júıesiniń buzylýy, saýda soǵystary, buryn-sońdy bolmaǵan ınflıasııalyq qysym – munyń bári búgingi kúnniń shynaıy kórinisi. Mundaı jaǵdaıda memleket pen bıznes jańa oıyn erejelerine tez beıimdelýi kerek. Biz tek osylaı ǵana básekege qabi­let­tiligimizdi saqtaı alamyz, – dedi Pre­zıdent.

Qasym-Jomart Toqaev júrgizilip jatqan aýqymdy demokratııalyq reformalar, jýyrda ótken jalpyulttyq referendýmnyń negizgi maqsat-mindetteri týraly aıtty. Prezıdenttiń paıymynsha, júrgizilip jatqan saıası reformalar keshendi ekonomıkalyq jańǵyrýmen qatar júrýge tıis.

– Dál osyndaı tásil bizge ortasha tabystyń qyspaǵynan shyǵýǵa, damýdyń kelesi deńgeıine ótýge jol ashady. Sondyqtan biz, shyn máninde, elimizdiń naryqtyq, erkin ári básekege qabiletti ekonomıka qurýǵa baǵyttalǵan jańa ekonomıkalyq saıasatyn júzege asyryp jatyrmyz. Osyǵan baılanysty ınvestısııalyq ahýaldy júıeli túrde jaqsartýǵa da erekshe kóńil bólemiz, – dedi Memleket basshysy.

Prezıdent ekonomıkany kómirteginen aryltý jáne kómirtegin az paıdalaný tehnologııasyn engizýdiń ózektiligine nazar aýdardy. Atap aıtqanda, klımattyń ózgerýine, bıdaı óniminiń azaıý jáne sý resýrstarynyń jetkiliksiz bolý qaterlerine baılanysty problemalardy sheshý úshin shuǵyl túrde júıeli sharalar qabyldaý máselesine toqtaldy.

Qasym-Jomart Toqaev Qazaqstan­daǵy barlyq parnıktik gaz qaldyq­tarynyń 80 paıyzy qazba otyndaryn paıdalaný ar­qyly energııa óndirýmen baı­lanysty jáne bunyń elimizdiń klımatyna keri áser etetin negizgi faktor ekenin atap ót­ti. Onyń aıtýynsha, ener­getıka salasyn jańǵyrtýdyń aıtar­lyqtaı mańyzy bar.

Qazaqstan Prezıdenti ınvestısııalyq ahýaldy odan ári jaqsartý jáne ınves­torlardyń zańdy quqyǵyn qorǵaý júıe­sin jetildirý memleketimizdiń strate­gııalyq mindeti ekenin atap ótti.

– Byltyr sheteldik seriktester bizdiń ekonomıkamyzǵa shamamen 24 mıllıard dollar ınvestısııa saldy. Bul onyń aldyndaǵy jylmen salystyrǵanda 38 paıyzǵa kóp. Bir aıta keterligi, sheteldik ınvestısııanyń 60 paıyzdan astamy qazirdiń ózinde ekonomıkanyń shıkizattyq emes sektoryna tıesili. Biz bul ınvestısııalardy joǵary baǵa­laı­myz jáne sheteldik seriktester aldyn­daǵy barlyq mindettememizdi minsiz oryn­daýǵa bar kúshimizdi salamyz. Qazaq­stan ınvestorlar úshin ashyq esik saıasa­tyn kúsheıte túsedi, – dedi Memleket basshysy.

Qasym-Jomart Toqaev shetel­dik kompanııalarmen tikeleı yqpal­dastyqty jolǵa qoıý, sonyń ishinde olardy elimizge kóshirý nemese birlesken kásiporyndar ashý úshin barlyq ınstıtýsıonaldyq jaǵ­daı jasaýǵa daıyn ekenin málim­dedi.

– Bizdiń maqsatymyz – ınnovasııa­lardy damytý jáne elimizdegi adam kapı­talynyń deńgeıin arttyrý. Shetel ınves­torlarynyń keńesi bul jerde, ásirese, ózara tıimdi sheshimderdi tabý jáne ynty­maqtastyqtyń ózekti baǵyt­tary jóninde tájirıbe almasý turǵy­synan ózine tıisti rólin atqarýy kerek dep esepteımin. Úkimet osy keńes­pen bir­lese otyryp, atalǵan másele­lerdi she­shýdiń naqty sharalaryn taldap, ázirleýi qajet, – dedi Qazaqstan Prezıdenti.

Qasym-Jomart Toqaev ınves­tı­sııalyq ahýaldy jaqsartý jónindegi júıeli jumys aýqymdy reformalarmen ushtasatynyn aıtty. Bul jerde adal básekelestikti damytý, sybaılas jemqorlyqty joıý, tıimdi memlekettik basqarý, adam kapıtalynyń sapasyn arttyrý jáne sot júıesin reformalaý máseleleri sóz boldy.

Memleket basshysy óz sózinde 2060 jylǵa deıin kómirteginen beıtarap­tyqqa qol jetkizý úshin kúsh jumyl­dyrý kerek ekenine erekshe nazar aýdardy. Sondaı-aq aýqymdy ekonomı­kalyq, tehnologııalyq jáne áleýmettik jań­ǵyrýlardy qamtıtyn tıisti strategııalyq joba ázirlenip jatqanyn jetkizdi. Bul jyl sońyna deıin qabyldanýǵa tıis.

Prezıdent Eýropalyq odaqtyń 2030 jylǵa qaraı parnıktik gaz qaldyqtaryn 55 paıyzǵa azaıtýǵa jáne 2050 jylǵa qaraı kómirteginen beıtaraptyqqa qol jetkizýge nıetti ekenin eske saldy. Bul rette Memleket basshysy 2026 jyldan bastap qazaqstandyq eksporttaýshylar Eýropa odaǵynyń bıýdjetine shekaralyq kómirtegi salyǵyn tóleıtinine jáne bul otandyq ónimniń básekege qabilettiligine áser etýi múmkin ekenine nazar aýdardy.

Osy rette Qasym-Jomart Toqaev el ekonomıkasyndaǵy kómirtegin paı­dalaný kólemin tómendetý jáne ekono­mıkalyq shyǵyndardyń aldyn alý úshin atqarylyp jatqan sharalarǵa egjeı-tegjeıli toqtaldy. Atap aıtqanda, qaldyqtardy saý­dalaýǵa qatysty ulttyq júıeni eýropalyq júıege jaqyndatý jóninde Úkimettiń atqaryp jatqan jumysy týraly málimdedi.

– Parnıktik gaz qaldyqtarynyń úlestik koeffısıentteriniń esepteý ádistemesin kúsheıtý baǵytynda qaıta qaraýdy jedeldetý qajet. Esepteý tásili eýropalyq ádiske sáıkes, ıaǵnı saladaǵy eń ozyq 10 óndiris negizinde jasalýǵa tıis. Osy rette óndiristiń negizgi ǵana emes, qosalqy túrlerin de eskerý kerek. Sondaı-aq Eýropa odaǵynyń qal­dyq­tardy satý júıesi sııaqty ekonomıka sektorlaryn keńinen qamtý qajet. Keńes músheleri is júzinde kómek kórsetýge tıis. Bul jumysty kelesi jyly aıaqtaý qajet, – dedi Prezıdent.

Memleket basshysy ekonomıkanyń eksportqa baǵyttalǵan sektorlaryna arnalǵan kvotalardy aqyly túrde bólýge kezeń-kezeńimen kóshý qajet eke­nin atap ótti. Prezıdenttiń pikirinshe, kvota saýdasynyń otandyq júıesi par­nık­tik gaz qaldyqtaryn ólsheý jáne tek­serý boıynsha senimdi derekterge negizdelýi kerek.

– Alaıda, is júzinde, biz múlde olaı emes ekenin kórip otyrmyz. Parnıktik gaz qaldyqtaryn tekserý jáne anyqtaý jónindegi organdar berilgen esepterdi qashyqtan kýálandyryp, qondyrǵylar ornatylǵan operatorlyq ýchaskelerge barmaıdy. Osylaısha, eldiń ártúrli aımaǵynda olar bir ýaqytta jıyrmaǵa jýyq esepti teksere alady. Mundaı esep­terdiń durystyǵy kúmán týdyrady. Sondyqtan Úkimetke parnıktik gaz qaldyq­taryn tekserý jáne anyqtaý jónin­degi organdardyń jaýapkershiligi men quzy­retin kúsheıtý jóninde pár­mendi sha­ralar qabyldaýdy tapsyramyn, – dedi Memleket basshysy.

Sonymen qatar, Qasym-Jomart Toqaev úlken energetıkalyq tásilge kóshý­ge daıyndyq jumystaryn birtindep ynta­lan­dyrýǵa baǵyttalǵan jańa Ekolo­gııalyq kodekstiń qabyldanǵany jóninde aıtty. Qujat kásiporyndardy ekolo­gııalyq tólemderden tolyǵymen bosatý arqyly óndiristi jańǵyrtýǵa múmkindik beredi. Bul rette Prezıdent iri ónerkásip kásiporyndaryna 2023 jyldyń 1 qań­tarynan bastap qaldyqtarǵa monıtorıng jasaıtyn avtomattandyrylǵan júıeni ornatý jónindegi mindetterin eske saldy. Sondaı-aq Úkimetke osy talapty ýaqtyly jáne sapaly oryndaýdy qamtamasyz etýdi tapsyrdy.

Qazaqstan basshysy atap ótken taǵy bir mańyzdy mindet – aýmaqtardy kógal­dandyrý jáne jańa alqaptarǵa aǵash otyrǵyzý.

– Meniń tapsyrmammen 2025 jylǵa deıin elimiz boıynsha eki mıllıard aǵash otyrǵyzý josparlanyp otyr. О́tken jyly 138 mıllıon, al bıyl 280 mıllıon aǵash egildi. Alaıda bul qarqyn jetkiliksiz, ony jyldamdatý qajet. Ke­ńes múshelerin atalǵan bastamany qol­dap, osy iske eleýli úles qosýǵa shaqy­ramyn, – dedi Memleket basshysy.

Prezıdent elimizde gaz tutynýǵa suranystyń artqanyn atap ótip, kómirdi paıdalanýdy azaıtý isinde gaz salasynyń mańyzdy ról atqaratynyn aıtty.

– Gaz eksportyna qaraǵanda ishki qajettilikterdi qamtamasyz etý mańyzdy ekenin qadap aıtqym keledi. Úkimetke Teńiz ken ornynyń aksıonerlerimen bir­lese otyryp, eksporttalatyn eki mıllıard tekshe metr gazdy ishki naryqqa qaıta baǵyttaýdy tapsyramyn, – dedi Qasym-Jomart  Toqaev.

Memleket basshysy jańartylatyn jáne balamaly energııa kózin damytý áleýetiniń artyp kele jatqanyna toqtaldy. 2030 jylǵa qaraı elimizdiń energııa teńgerimindegi jańartylatyn energııa kózin keminde 15 paıyzǵa deıin arttyrý mindeti qoıyldy.

Sonymen qatar Prezıdent atom ener­gııasyn paıdalanýdyń mańyzdy ekenin atap ótti. Onyń pikirinshe, jańar­tylatyn energııanyń turaqsyz jáne gaz taratý isi shekteýli bolǵan jaǵdaıda «zalalsyz» atom úzdiksiz energııa berýdiń jalǵyz kózi bolady.

Jıyn barysynda Eýropalyq qaıta qurý jáne damý bankiniń prezıdenti Odıl Reno-Basso, Premer-mınıstrdiń orynbasary – Saýda jáne ıntegrasııa mınıstri Baqyt Sultanov, Ulttyq ekonomıka mınıstri Álibek Qýantyrov, «Shetel ınvestorlarynyń qazaqstandyq keńesi» Assosıasııasy basqarmasynyń tóraǵasy Erlan Dosymbekov, Azııa damý bankiniń vıse-prezıdenti Ashok Lavasa, Chevron korporasııasynyń atqarýshy vıse-prezıdenti Djeıms Djonson, Eýropa, Taıaý Shyǵys jáne Afrıka elderindegi Citigroup kompanııasynyń bas atqarýshy dırektory Devıd Lıvıngston, ERG Sarl dırektorlar keńesiniń tóraǵasy Aleksandr Mashkevıch, Exxon Mobil korporasııasynyń aǵa vıse-prezıdenti Nıl Chapman, Reseı men TMD elderindegi General Electric kompanııasynyń prezı­denti Bela Ferensı, Shyǵys Eýropa bo­ıynsha Philip Morris International kompa­nııasynyń prezıdenti Marko Marıottı, «Polımetall ÝK» AQ prezıdenti Igor Fınogenov, Ortalyq jáne Shyǵys Eýropa elderindegi PwC kompanııasynyń basqarýshy seriktesi Nık Kosh, Veon Ltd tobynyń bas atqarýshy dırektory Kaan Terzıoglý, Azııa-Tynyq muhıty aımaǵy boıynsha TotalEnergies kompanııasynyń aǵa vıse-prezıdenti Jýlıen Pýje baıandama jasady.

Keńeste Eýropalyq qaıta qurý jáne damý bankiniń prezıdenti Odıl Reno-Basso jańartylatyn energııa kózderin paıdalanýdy aıtarlyqtaı keńeıtýdi usyndy. «Eski tabıǵı resýrstar – kómir, munaı men gazdan jel men kúnnen energııa óndirýge tolyqtaı kóshý kerek. Atap aıtqanda, biz 2025 jylǵa qaraı kem degende 2 GVt qýat óndiretin jel jáne kún elektr stansııalaryn salýdy usynamyz. О́ıtkeni jańartylatyn energııa kózderi kómirtekti alý men saqtaýǵa qaraǵanda arzanyraq», dedi Odıl Reno-Basso. Sonymen qatar ol ortalyqtandyrylǵan jylýmen qamtý sektoryn transformasııalaý qajetine toqtaldy. «Qazaqstan úshin ortalyqtandyrylǵan jylý berý­diń qanshalyqty mańyzdy ekenin bilemiz. Kómirge turaqty táýeldilik aýany las­taıdy. Geotermaldyq energııa, bıomas­sa jáne kún energııasy sııaqty jańar­tylatyn resýrstarǵa kóshý sizdiń jylý sektoryńyzdy ózgertedi jáne Qazaqstan azamattaryna tikeleı paıda ákeledi», dep qosty ol.

Al Azııa damý bankiniń vıse-prezı­denti Ashok Lavasa 2021 jyly ADB QazaqGas UK AQ úshin 1 mıllıonǵa deıin smart gaz eseptegishterin ornatý arqyly bólshek saýdadaǵy gazdy esepke alý júıesin jańartý úshin 100 mıllıon dollar ulttyq valıýta­daǵy nesıeni maquldaǵanyn jetkizdi. «Bul nesıe operasııalyq tıimdilikti arttyrýǵa jáne ysyraptar men par­nıktik gazdardyń zııan­dy qaldyqtaryn azaıtýǵa baǵyttalǵan. Sondaı-aq ADB EQDB-men birge Almaty qalasyna aıtarlyqtaı ekologııalyq paıda ákeletin Almaty JEO-2 jańǵyrtý jobasyn birlesip qarjylandyrý múmkindigin qarastyrýda», dedi Ashok Lavasa.

Sonymen qatar Chevron korpo­ra­sııasynyń atqarýshy vıse-prezıdenti Djeıms Djonson Qazaqstannyń tómen kómirtekti bolashaqqa baǵyttalǵan ári qaraı­ǵy qadamdardy talqylaý úshin ınves­torlardy tartýǵa degen umtyly­syn joǵary baǵalaıtynyn jáne Qazaq­standy «energııa tranzıtinde», kómirtegi shyǵaryndylaryn azaıtýǵa baǵyttalǵan bastamalaryn qoldaýǵa daıyn ekenin aıtty. «Shevron qoǵamnyń qoljetimdi, senimdi jáne taza energııaǵa degen qajettiligine qyzmet etedi jáne kómirtegi qarqyndylyǵyn azaıtý úshin tıimdi tehnologııalardy paıdalana otyryp, energııa jáne munaı men gaz óndirýde kóshbasshy. Qazaqstanda Chevron seriktesterimen energııa tıimdiligin arttyrý jáne bizdiń nysandardaǵy metan shyǵaryndylaryn basqarý boıynsha jumys istep jatyr. Biz sondaı-aq Qazaqstannyń munaı-gaz ónerkásibindegi jáne ekonomıkanyń basqa da energııany kóp qajet etetin sektorlaryndaǵy nysandardyń kómirtegi syıymdylyǵyn tómendetý boıynsha yntymaqtastyqtyń jańa múmkindikterin qarastyrýdamyz. Osyǵan baılanysty «Shevron» men «Qaz­MunaıGaz» Qazaqstandaǵy óndirý, kádege jaratý jáne paıdalaný jo­balaryn birlesip zertteýge kelisti. Jańa birlesken jobalar men sheshim­derdi júzege asyrýmen qatar, biz az shyǵaryndylary bar tabıǵı gazdy paıdalaný tómen kómirtekti bolashaqqa mańyzdy qadam bola alady dep esepteımiz. Biz Qazaqstanda tabıǵı gazdy óndirý men paıdalanýdy ońtaılandyrý úshin salamen jáne úkimetpen jumys isteýge daıynbyz», dedi óz sózinde Djeıms Djonson.

Eýropa, Taıaý Shyǵys jáne Afrıka elderindegi Citigroup kompa­nııasynyń bas atqarýshy dırektory Devıd Lıvıngston «Citigroup kompanııasy úkimettiń klımattyń ózgerýimen kúresý jónindegi is-áreketin qoldaıdy. Biz ekotıimdi qarjylandyrý eń úlken ınvestısııalyq múmkindikterdiń biri ekenin moıyndaımyz. Qazaqstanda jáne kórshiles elderde «jasyl ekonomıkany» qarjylandyrýdy odan ári damytý jáne ilgeriletý úshin Astana halyqaralyq qarjy ortalyǵy qurǵan quqyqtyq-normatıvtik baza Qazaqstandy qarjynyń osy salasyndaǵy óńirlik ortalyǵyna aınaldyrady, bul salada saraptamany qamtamasyz etedi dep kútemiz», dedi. Citigroup kompanııasy elde 30 jylǵa jýyq qyzmet etip keledi. «Biz eldiń ósýi men damýyn jedeldetý úshin sheteldik ınvestısııanyń mańyzdylyǵyn moıyndaımyz, sondyqtan ekonomıkany kómir­teksizdendirý boıynsha Qazaq­stanǵa qoldaý kórsetýdi jalǵastyrý – basty basymdyq. Prezıdent myrza, Citigroup kompa­nııa­sysizdiń Qazaqstandaǵy kómir­qysh­­qyl­syzdandyrý baǵdarlamasyn ilgeriletý jónindegi kúsh-jigerińizdi qoldaıtynyn taǵy da qaıtalaýǵa ruqsat etińiz. Biz ınvestor, nesıe berýshi jáne senimdi keńesshi retinde qoldaýymyz ben min­dettememizdi jalǵastyra otyryp, Qazaqstannyń bolashaqqa saparynyń bir bóligi bolǵanymyzǵa óte qýanyshtymyz», dep qosty Devıd Lıvıngston.

Al ERG Sarl dırektorlar keńesiniń tóraǵasy Aleksandr Mashkevıch bir ǵana Pavlodar oblysyndaǵy kásip­oryndarda 2030 jylǵa deıin 16 iri ekojobany josparlap otyrǵanyn aıtty. Josparlanǵan ınvestısııa 134 mlrd. Jobanyń maqsaty – 2030 jylǵa qaraı lastaýshy zattardyń zııanyn 30%-ǵa azaıtý. «Sondaı-aq bizdiń strategııamyzda jańa tehnologııalyq sheshimderdi ázirleý jáne qoldaný bar. Mysaly, aglomerasııalyq peshterden shyǵatyn gazdardyń shań-gaz aǵynyn arnaıy skrýbberlerde azdap siltili eritindimen óńdeý. Bul bizge 50%-ǵa deıin SO2 alýǵa múmkindik beredi. Degenmen tehnologııa glınozemniń qunyn arttyrady. Bizdiń basqa jobamyz boksıtterdi aldyn ala óńdeý de úlken ınvestısııany qajet etedi, biraq biz tehnologııany ózgertý ener­gııa tutynýdy azaıtýǵa múmkindik beretinin bilemiz», dedi Mashkevıch. So­nymen qatar ol, «kómirden bas tarta otyryp, búgingi tańda ónerkásipte 27 myńǵa jýyq adam jumys isteıtinin túsinýimiz kerek. Biz áleýmettik jaýapty kompanııa retinde sonsha jumysshy men olardyń otbasyn kúnkórissiz qaldyra almaımyz. Jumyspen qamtý, qaıta daıarlaý, Top quramyndaǵy kásiporyndarǵa aýystyrý máselelerin sheshýge jyldar qajet. Bizde tájirıbe bar. Arqalyq qalasyndaǵy 670 adamy bar jaýapty TBRÝ-ny jabý úshin bizge shamamen 4 jyl qajet boldy. Búginde Qazaqstannyń kómirdi paıdalanýdan aıtarlyqtaı shyǵynǵa ushyraǵany týraly kóp aıtylyp júr. Degenmen elimizdiń kómir óndirýden alatyny az. Al bul arzan elektr energııasy, salyqtar, sonymen qatar myńdaǵan jetkizýshiler men kómir kásiporyndarynyń seriktesterinen túsetin janama oryndar. Sondyqtan, kómir qýattary, árıne, aldaǵy ýaqytta Qazaqstannyń energetıkalyq sektorynda bolatynyn bilýimiz kerek. Kómirden birden bas tartý múmkin emes. Bul qarapaıym kómirshilerge ádiletsizdik bolady. Bizge kómir kenishterine tartylǵan mamandardy qaıta daıarlaýdan bastap, ekonomıkanyń jańa salalaryn qurýǵa deıingi keshendi baǵdarlama qajet», degen pikirin bildirdi A.Mashkevıch.

О́z kezeginde Ulttyq ekonomıka mınıstri Álibek Qýantyrov elde kómir ónerkásibinde shamamen 30 myń adam jumys isteıtinin atap ótti. «Kómirden bas tartý ońtaıly túrde júrgiziledi, ol birtindep júzege asyrylady. О́ıtkeni túbegeıli kóshe almaımyz. Tipti, álemde birde-bir el muny júzege asyra almaıdy», dedi mınıstr. Memleket basshysy da Qazaqstan kómirden dál qazir múldem bas tarta almaıtynyn jetkizdi.

Qazaqstan energetıkasyn dekarbonızasııalaý jolyndaǵy kedergilerge toqtalǵan Ortalyq jáne Shyǵys Eýropa elderindegi PwC kompanııasynyń Bas atqarýshy dırektory Nık Kosh keńes aıasyndaǵy kezdesýler bıznes basshylaryn shabyttandyratynyn atap ótti.

«Ekonomıkany transformasııalaý prosesi daǵdarysqa deıin bastaldy, óıtkeni Úkimet ekonomıkany árta­raptandyrý jáne klımattyń ózgerýine qarsy kúres sııaqty eń ózekti máselelerdi sheshý úshin sharalar qabyldaý qajet­tiligin túsindi. Aldymen COVID, al qazirgi tańda Ýkraınadaǵy soǵys ja­han­dyq saıası jáne ekonomıkalyq landshaftty túbegeıli ózgertti. Búgin biz osy oqıǵalardyń barlyq saldaryn naqty boljaı almaımyz.

Osy turǵydan alǵanda, Qazaq eliniń kúsh-jigeri erekshe áser etti. Qazaqstan óz aldyna ekonomıkany dekarbonızasııa­laý, atap aıtqanda 2060 jylǵa qaraı kómirtegi beıtaraptyǵyna qol jetkizý, 2030 jylǵa qaraı jańartylatyn energııa óndirýdiń 15 paıyzyna shyǵý boıynsha aıtarlyqtaı bıik maqsattar qoıdy. Qoıylǵan maqsattarǵa qol jetkizý úshin Úkimet tıisti tetikterdi engizý arqyly ınstıtýsıonaldyq jáne ekonomıkalyq negiz salý úshin kúrdeli, biraq qajetti sheshimder qabyldaýy qajet.

«Jasyl» ınnovasııalyq tehnologııalar men taza energııaǵa ınvestısııalar tartý eldiń maqsattaryna qol jetkizý úshin qajet.

Aqyldy elektrmen jabdyqtaý jeli­leri (Smart Grid), jańartylatyn ener­gııa kózderi, kólikti elektrlendirý (EOT) sııaqty aqyldy ári taza tehno­lo­gııalarǵa ınvestısııa salýǵa yntalandyrý jańa salanyń paıda bolýyna túrtki boldy.

«Jasyl» qarjy quraldarynyń jańa naryǵy damýda, onyń kólemi jyl saıyn eki tańbaly sanǵa ulǵaıýda. Bul jańa ekologııalyq taza tehnologııalarǵa ınvestısııalar áleýetin ashýǵa oń serpin beredi», dedi ol.

Kompanııa basshysy sondaı-aq, Eýro­palyq Odaqtaǵy PwC-tiń ekologııalyq taza jáne turaqty ekonomıka qurý jónindegi óz mindettemelerin atap ótti. Onyń aıtýynsha, Ortalyq Azııadaǵy barlyq PwC kompanııalary 2030 jyly R kómirtegi beıtaraptyǵyna qol jetkizý úshin PwC ǵalamdyq mindettemesin oryndaýǵa kómektesý maqsatynda NetZero ishki baǵdarlamasyn iske qosqan.

«Biz Ortalyq jáne Shyǵys Eýropa aýmaǵyna 6 mln AQSh dollaryn ınvestısııalaımyz, bul jergilikti ınvestısııalardy aıtarlyqtaı tolyqtyrady jáne PwC kompanııasynyń ESG jáne turaqty damý salasyndaǵy klıentterge qyzmet kórsetý múmkindikterin keńeıtedi. Biz aımaqta USB Hub qurýdy bastadyq, bul bizdiń klıentterge osy baǵytta qyzmet kórsetý múmkindigin edáýir arttyrdy», degen N.Kosh Qazaqstandy jáne jergilikti bıznesti qoldaýǵa daıyn ekendikterin aıtty.

Memleket basshysy sózin qory­tyn­dylaı kele, Keńes múshelerin «jasyl» jobalardy júzege asyrý, ESG ınves­tısııasyn tartý jáne ornyqty damý maqsattaryna qol jetkizý jónindegi is-qımyldardy jandandyrýǵa shaqyrdy.