Qaı elde bolmasyn qarýly kúshterdiń mańyzy zor, memleket te aldymen osy salaǵa basymdyq beredi. Ásirese eldegi desanttyq-shabýyldaý áskerleriniń qyzmeti erekshe. Bıyl atalǵan áskerdiń qurylǵanyna – 22 jyl tolyp otyr.
2000 jyldyń 6 shildesinde Memleket basshysynyń Jarlyǵymen Qazaqstan Respýblıkasynyń Qarýly Kúshterinde Utqyr kúshter quryldy. Olar keıinnen Aeroutqyr áskerler bolyp ózgerdi. Al 2017 jyly zaman talabyna saı Desanttyq-shabýyldaý áskerleri degen ataý ıelendi. Qazirgi ýaqytta desanttyq-shabýyldaýshy áskerler joǵary mobıldi jáne sońǵy úlgidegi tehnıkamen jabdyqtalǵan, negizgi kúshterden, onyń ishinde jaý tylynda basqa da tapsyrmalardy óz betinshe oryndaýǵa qabiletti. Olardyń jaýyngerlik qýatyn desanttyq-shabýyldaý, artıllerııalyq, barlaý, bitimgerlik quramalary, bólimder men bólimsheler quraıdy.
Desanttyq-shabýyldaý áskerleri barlyq oqý-jattyǵýlarǵa, sonyń ishinde halyqaralyq jattyǵýlarǵa udaıy qatysyp júr. Atap aıtqanda, olar Armııa halyqaralyq oıyndarynda nátıjeli óner kórsetti. Desantshy-jaýyngerler árdaıym ózderiniń joǵary daıyndyq deńgeıin, kásibı sheberlikterin, asa kúrdeli tapsyrmalardy oryndaýǵa qabilettiligin kórsetip keledi.
Áýe-desanty daıyndyǵy – áskerdegi mańyzdy másele. Kók tarlandary kúndiz de, túnde de, tipti kúrdeli meteorologııalyq jaǵdaılarda da parashıýtpen senimdi túrde sekiredi. Bitimgerlik qyzmet atqarýda da desanttyq-shabýyldaý áskerleriniń qosqan úlesi zor. «Qazpolk» áskerı qyzmetshileri 2003-2008 jyldar aralyǵynda Iraktaǵy bitimgerlik mıssııaǵa qatysty. 2018 jyldan bastap «Qazpolk» jáne «Tilendıev» bitimgerlik daıyndyq ortalyǵy bazasynda qazaqstandyq bitimgerler sheberligin shyńdap keledi.
Desanttyq-shabýyldaý áskerlerinde qyzmet etý qashanda abyroıly mindet sanalady. Bólimder men bólimshelerdi jasaqtaýǵa qatań irikteý júrgiziledi. Munda Otan aldyndaǵy boryshyn óteýge kelgen merzimdi áskerı qyzmetshiler ter tógedi. Ádette, olardyń sporttyq razrıadtary bar jáne psıhologııalyq turaqtylyq deńgeıi joǵary. «Desantshylar – qandaı tapsyrmalardy oryndasa da, anyq ári sheber is-qımyl jasap, batyldyq pen eptilik kórsetetin, shydamdylyǵy men jaýyngerlik mashyǵy myqty, kez kelgen sátte egemen Qazaqstandy qorǵaýǵa ázir naǵyz jaýyngerler», deıdi Qorǵanys mınıstrliginiń ókilderi.