Ishki ister mınıstrligi Ákimshilik polısııa komıteti tóraǵasynyń mindetin atqarýshy Jandos Muratálıevtiń aıtýynsha, bıyl elimizde 308 jaıaý júrginshi qaıtys boldy, dep habarlaıdy Egemen.kz.
«Jol-kólik oqıǵasynda mert bolǵandardyń jáne jaraqat alǵandardyń tórtten bir bóligi jaıaý júrginshiler. Bıyl elimizdiń joldarynda 308 jaıaý júrginshi kóz jumdy jáne 2 168-i túrli dene jaraqattaryn aldy», dedi vedomstvo ókili.
Osy oraıda ol jaıaý júrginshiler jolda jaýapkershilik tanytýy tıis ekenin, joldaǵy qaýipsizdik jalpy alǵanda jaıaý júrginshige de, kólik júrgizýshisine de qatysty ekenin atap ótti.
«Baǵdarshamnyń qyzyl túsin elemeı júrgen nemese joldy belgilenbegen jerinen kesip ótken jaıaý júrginshi jol apatyna kináli bolyp jatady. Jaıaý júrginshilerdiń kesirinen 265 jol-kólik oqıǵasy tirkelip, onda 55 adam qaza bolyp, 217-si túrli jaraqat aldy», dedi vedomstvo ókili.