Memleket basshysy Qasym-Jomart Toqaev Almaty oblysynyń jurtshylyǵymen kezdesýde ana tilimiz - qazaq tili árdaıym birinshi orynda bolyp, bárimiz úshin negizgi basymdyq bolýy qajet ekenin aıtty, dep habarlaıdy Egemen.kz.
«Álem halyqtarynyń jaqsy qasıetterin boıǵa sińirip, ozyq úrdisterin úırený úshin til bilý qajet. Babalarymyz «Jeti jurttyń tilin bil, jeti túrli ilim bil» dep aıtqan. Shyn máninde, jastar neshe til bilse, aldynan sonsha eldiń esigi aıqara ashylady. Bul týǵan elińniń múddesine qyzmet etý úshin qajet. Degenmen, eń aldymen, jastarymyz ana tilin – qazaq tilin bilýi kerek», dedi Prezıdent.
Qasym-Jomart Kemelulynyń aıtýynsha, búginde qazaq tiline negizgi basymdyq berilýi kerek.
«Ana tilimiz birinshi orynda bolyp, bárimiz úshin negizgi basymdyq bolýy qajet. Solaı bolady da dep atap aıtqym keledi. Jalpy, biz tilimiz damymaı jatyr degen oıdan arylýymyz kerek. Táýelsizdik kezeńinde onyń mártebesi bıiktemese, tómendegen joq. Qanshama aqparat quraldary habar taratady. Gazet-jýrnaldar, kitaptar shyǵyp jatyr», dep atap ótti Memleket basshysy.