Búgin Almatyda Respýblıka kúni ulttyq merekesine oraı memlekettik marapatty tabystaýǵa arnalǵan saltanatty rásim ótti, dep habarlaıdy Egemen.kz.
Mádenıet jáne óner qaıratkerlerinen basqa ulttyq sport sportshylary – palýandar men shabandozdar, sonyń ishinde Túrkııada ótken IV dúnıejúzilik kóshpendiler oıyndarynyń jeńimpazdary atalyp ótti. Memleket basshysynyń tikeleı tapsyrmasy boıynsha memlekettik marapatty Mádenıet jáne sport mınıstri Dáýren Abaev tabys etti.
«Biz bul kúnge damýdyń biryńǵaı dańǵyl jolymen jettik dep aıta almaımyz. Tar jol taıǵaq keshýler boldy. Sondyqtan da Memleket basshysynyń Ulttyq mereke mártebesin dál osy kúnge qaıtarý sheshimi ádildiktiń saltanat qurý aktisi dep sanaýǵa bolady», dep atap ótti Dáýren Abaev marapattaý rásiminde.
Sondaı-aq shyǵarmashylyq odaqtar tóraǵasy, akterler men rejısserler, aqyn - jazýshylar, kompozıtorlar, teatr artısteri, sýretshiler, anımasııa rejısserleri, mýzeı qyzmetkerleri jáne taǵy basqalar Qazaqstan Respýblıkasy Prezıdentiniń Alǵys hatymen jáne Qurmet gramotasymen marapattaldy.
«Mádenıet jáne sport mınıstrligi shyǵarmashylyq odaqtarmen yntymaqtastyqty jandandyrýǵa nıetti. Biz árkez utymdy usynystarǵa ashyqpyz jáne qyzyqty jáne keleshegi zor jobalardy qoldaýǵa daıynbyz. Osyǵan deıin sizdermen birneshe ret kezdesý ótkizdik, ózekti máselelerdi talqyladyq jáne sheshimderdi birlesip ázirlep jatyrmyz. Mınıstrlik osy baǵyttaǵy jumysty jalǵastyrady», dedi mınıstr D.Abaev.
Aıta keteıik, sondaı-aq shyǵarmashylyq odaqtarmen jáne qaýymdastyqtarmen ózara is-qımyl jáne yntymaqtastyq jónindegi keńes otyrysy ótti.