Qazaqstan Premer-Mınıstri Álıhan Smaıylov О́zbekstan Premer-Mınıstriniń orynbasary Jamshıd Hodjaevpen jáne Jýrabek Myrzamahmýdovpen saýda-ekonomıkalyq yntymaqtastyqty nyǵaıtý máselelerin talqylady, dep habarlaıdy Egemen.kz Úkimettiń resmı paraqshasyna silteme jasap.
Kezdesý barysynda Álıhan Smaıylov О́zbekstan Qazaqstannyń Ortalyq Azııa óńirindegi negizgi saýda-ekonomıkalyq áriptesi ekenin atap ótti. О́tken jyldyń qorytyndysy boıynsha ekijaqty taýar aınalymy shamamen 33%-ǵa ósken. Bıyl da oń dınamıka kórsetip otyrǵanyn jetkizdi.
Sondaı-aq Premer-Mınıstr memleketter arasyndaǵy ekonomıkalyq yntymaqtastyqty nyǵaıtýǵa Qazaqstan-О́zbekstan Úkimetaralyq komıssııasy men О́ńiraralyq yntymaqtastyq forýmy eleýli úles qosyp otyrǵanyn aıtty.
«Kooperasııa qarqynyn arttyrýymyz kerek. Eger strategııalyq kooperasııalyq jobalarymyz kóp bolsa, bul bıznesti damytýǵa jáne saýdadaǵy kedergilerdi joıýǵa serpin beredi. Jalpy, ózara taýar aınalymyn ulǵaıtý baǵytynda jumys isteýge daıynbyz», dedi Jamshıd Hodjaev.