Oqytýy sapa standarttaryna sáıkes kelmeıtin, kadrlar daıarlaýǵa jaǵdaı jasalmaǵan jáne suranys joq mamandyqtardyń lısenzııalary alyndy, dep habarlaıdy Egemen.kz Oqý-aǵartý mınıstriliginiń resmı paraqshasyna silteme jasap.
Birqatar kolledj bilim berý uıymynyń beıinine sáıkes kelmeıtin mamandyqtar boıynsha lısenzııalardy qaıtardy. Mysaly, pedagogıkalyq kolledjde zańgerlerdi, al ekonomıkalyq kolledjde muǵalimderdi daıarlaýǵa lısenzııanyń qosymshasy bolǵan. Sondaı-aq keıbir kolledjder qajetti oqý quraldarynsyz mamandar daıyndap kelgen.
Nátıjesinde 57 qazaqstandyq kolledj 133 mamandyq pen 164 biliktilik boıynsha lısenzııalarǵa qosymshalardy qaıtarǵan.
«Oqý-aǵartý mınıstrligi kolledjderdiń profıli boıynsha jumysty jalǵastyryp jatyr. Kadrlardy daıarlaý úshin jaǵdaılar joq beıindi emes mamandyqtardyń lısenzııalaryn qaıtarý TjKB uıymdaryna «suranysqa ıe» jáne beıindi mamandyqtarǵa nazar aýdarýǵa múmkindik beredi. Bul tehnıkalyq jáne kásiptik bilim berý sapasyn arttyrý úshin qajet. Bilim alýǵa qajetti jaǵdaı jasalmaǵan, qural-jabdyqtar, sheberhanalar, muǵalimder men oqytýshylar joq kolledjderde mamandyqtardy qysqartý boıynsha jumystar júrgizilip jatyr», dedi Oqý-aǵartý mınıstrligi Bilim sapasyn qamtamasyz etý komıtetiniń tóraǵasy Ernur Dáýenov.