Indýstrııa jáne ınfraqurylymdyq damý mınıstri Qaıyrbek О́skenbaev Fransııanyń Eýropa jáne syrtqy ister mınıstri janyndaǵy mınıstr-delegat, Qazaq-fransýz Úkimetaralyq komıssııasynyń tóraǵasy Olıve Beshtpen kezdesti, dep habarlaıdy Egemen.kz IIDM baspasóz qyzmetine silteme jasap.
Kezdesý barysynda ónerkásiptik gaz jáne energetıka salasyndaǵy, jańartylatyn energııa kózderi, kólik, avıasııa ónerkásibi jáne ǵarysh salalaryndaǵy ekijaqty ekonomıkalyq yntymaqtastyqtyń ózekti máseleleri talqylanǵan.
Is-sharaǵa Energetıka mınıstrligi, Ulttyq ekonomıka mınıstrligi, Densaýlyq saqtaý mınıstrligi, SDIAО́M, TJM, «Samuryq-Qazyna» AQ, «QTJ» UK, «QazMunaıGaz», «Eır Astana», «Qazavıaspas» jáne «KAES» JShS ókilderi qatysqan. Fransýz tarapynan onlaın formatta qazaq-fransýz iskerlik keńesiniń tóraǵalary jáne Total, Alstom, Orano, Air liquide, Airbus, CSFN, EDF jáne Idemia kompanııalarynyń basshylary qatysty.
Áńgime barysynda QR IIDM basshysy Fransııa Qazaqstannyń strategııalyq seriktesi ekenin atap ótti.
«Bıyl eki el arasyndaǵy dıplomatııalyq qatynastardyń ornaǵanyna 30 jyl toldy. Osy ýaqyt ishinde memleketterdiń qarym-qatynasy barlyq negizgi baǵyt boıynsha qarqyndy damyp keledi. Atap aıtqanda, 2022 jyldyń 8 aıynda taýar aınalymy 12,2%-ǵa, ıaǵnı $2,3 mlrd-qa deıin ósti», dedi Q.О́skenbaev.
О́z kezeginde O.Besht Qazaqstan Fransııanyń mańyzdy seriktesi ekenin rastady.
«Qazaq-fransýz Úkimetaralyq komıssııasynyń teń tóraǵalary deńgeıindegi turaqty baılanystar eki el arasyndaǵy yntymaqtastyqtyń mańyzdy ózekti baǵyttaryn talqylaýǵa jáne ózekti máseleler boıynsha sheshimder tabýǵa múmkindik beredi», dedi O.Besht.
Kezdesý qorytyndysy retinde Qazaqstan men Fransııa arasyndaǵy qarym-qatynasty odan ári damytýdyń mańyzdylyǵy aıtyldy.