Digital Nomads IT qoǵamdastyǵynyń ókilderimen suhbattasýymyzdy jalǵastyramyz. Almatylyq jas IT mamany ýnıversıtetti bitirgennen keıin Meta jáne Amazon kompanııalarynan qalaı usynys alǵanyn aıtyp berdi.
Aldymen Qazaqstannyń medıa keńistigi Meta kompanııasy jáne TikTok syndy áleýmettik jeli túrlerimen baılanys ornatýǵa nıetti ekenin aıtyp óteıik. Jaqynda elordada ótken Medıa salasynyń ókilderine arnalǵan AstanaMediaWeek-2022 aptalyǵynda Aqparat jáne qoǵamdyq damý mınıstri Darhan Qydyráli qos kompanııamen tyǵyz baılanysta jumys isteıtinin málimdegen edi.
– Meta Qazaqstanda ókildik, al TikTok ofıs ashýǵa, sonymen qatar medıasaýattylyq kýrstaryn oqytýǵa nıetti. О́ıtkeni qazirgi tańda vızýaldy kontent aqparat alýdyń negizgi kózine aınalyp bara jatyr. Máselen, 2021 jyldyń derekteri boıynsha 16-64 jas aralyǵyndaǵy ınternet paıdanýshylardyń 63 paıyzy ınternetti negizinen aqparatqa jyldam qol jetkizý úshin paıdalanady. Osylaısha, ınternettegi jańalyqtar men vızýaldy kontent aqparatty qabyldaýdyń negizgi arnasyna aınaldy, – degen edi mınıstr.
Quramyna Facebook, Instagram, WhatsApp jáne Oculus kiretin Meta dep atalatyn transulttyq holdıngtiń qazirgi tańda túrli elderdegi fılıaldarynda júzge jýyq qazaqtyń IT mamany qyzmet etedi. Sonyń biri – 22 jastaǵy Ǵalymjan Kenjetaev. Almatylyq Ǵalymjan Meta-nyń London qalasyndaǵy fılıalynda Software Engineer bolyp jumys isteıdi.
– Men mektepti Almatyda bitirdim. MÝIT-te oqydym. Úshinshi kýrstyń basynda algorıtmdik esepterge qyzyǵýshylyq tanyta bastadym, sodan ártúrli tehnologııalyq kompanııalarda taǵylymdamadan ótip, qosymsha jergilikti startaptarda tájirıbe jınaqtadym. 2021 jyly pandemııa aıaqtalǵan soń kompanııalar jańa qyzmetkerlerdi jınaýdy qaıta bastaǵanda, men de FAANG-qa ótinish berdim. Google, Meta jáne Amazon áńgimelesýge shaqyrdy. Nátıjesinde, Meta jáne Amazon-nan usynys alyp, Londondaǵy Meta-ǵa jumysqa ornalastym, dedi Ǵalymjan sheteldegi alǵashqy qyzmeti týraly.
Buryndary da týrıstik maqsatpen birneshe eldi aralaǵan Ǵalymjanǵa Londonnyń ómirine beıimdelý asa qıynǵa soqpaǵan.
– Kóshý kezinde qıyndyqtar bolǵan joq. О́ıtkeni iri tehnologııalyq kompanııalar qyzmetkerlerge qonys aýdarýǵa kómektesedi, olar ushaq bıleti men turǵyn úı aqysyn tóleıdi. Sonymen qatar tildik kýrstan ótýdi usynady, tipti kerek deseńiz úı janýarlaryn da tasymaldaýǵa kómek beredi. Osyndaı qamqorlyqtyń arqasynda IT kompanııada jumys tapqan adam úshin beıimdelý úderisi áldeqaıda jeńil. Men Qazaqstanda 22 jyl turdym, shetelge tek týrıst bolyp bardym. Sondyqtan alǵashynda Ulybrıtanııanyń jergilikti halqymen aralasyp ketý qıynǵa soǵa ma dep ýaıymdaǵan edim. Biraq Londonda kóp qazaq turatynyn kórgen soń, birden kóńilim ornyna tústi, kóp dostar taptym, – dedi Ǵalymjan.
Jas maman Meta-da AR effektileri, maskalar jáne Instagram oıyndaryn jasaıtyn Spark AR komandasynyń múshesi. Ǵalymjannyń aıtýynsha, kompanııada keri baılanysqa erekshe mán beriledi, qyzmetkerleriniń pikirimen sanasý birinshi orynǵa qoıylǵan.
– Meta keri baılanys mádenıetine ıe. Munda adamdar konstrýktıvti pikir bildirýdi jáne ony qabyldaýdy úırengen. Sizdiń mansaptyq ósýińiz osyǵan baılanysty. Maǵan kompanııada unaıtyny, baǵdarlamalyq qamtamasyz etý ınjenerleri sizdiń qaı tilde nemese qandaı tehnologııamen jumys isteıtinińizge mán bermeıdi. Basqa kompanııalarda adamdar belgili bir tehnologııalyq stekke belgili bir laýazymǵa jaldanady. Meta-da sizdi ártúrli tehnologııalarmen jumys isteıtin túrli jobalarǵa qatystyryp jiberýi ábden múmkin. Eshkim senen bárin biledi dep kútpeıdi. Árkimge qajetti daǵdylardy meńgerý úshin ýaqyt pen tálimger beriledi. Jalpy, Meta-da ózge kompanııalarmen salystyrǵanda múmkindik kóbirek. Máselen, Londondaǵy ofıstarynda úsh ret tamaq beredi, transportqa ketken aqshany ótep beredi jáne sportqa qatysty satyp alǵan zattaryńyzdyń aqysyn da tóleıdi. Bul jerde de basqa elderge saparlarǵa shyǵý múmkindigi bar. Meta sizdi basqa elden kóshirip alyp kelgen jaǵdaıda, kóshýmen baılanysty búkil shyǵyndardy ótep beredi. Sonymen qatar turǵyn úı tabýǵa, buryn turǵan elden jeke zattaryńyzdy alyp kelýge kómektesedi, bastapqy birneshe aı otel arendasyn tóleıdi, – dep Meta-nyń artyqshylyqtaryn aıtty otandasymyz.
Meta-nyń tájirıbesiz mamandardan da birden bas tartpaıtynyn aıtqan Ǵalymjan: «Bul jerde tájirıbeli mamandarǵa túrli vakansııalar ashylady. Degenmen tájirıbesiz mamandardy, ıaǵnı oqý ornyn jaqynda bitirgenderdi de jumysqa alady. Eń bastysy – ıntervıý kezinde eń qajetti algorıtmdik esepterdi sheshe alsańyz bolǵany. Odan bólek, soft skills-qa, ıaǵnı adamı qasıetterge kóp kóńil bóledi», deıdi.
Jýyrda Meta bas dırektory Mark Sýkerberg kompanııanyń 11 myńnan astam qyzmetkerin qysqartatynyn málimdegen bolatyn. Osy máseleniń anyq-qanyǵyn Ǵalymjannan suraǵan edik.
– 11 myń adam shynymen qysqartyldy. Bul kompanııa tarıhynda eń birinshi úlken qysqartý. Bul árıne álemdegi ekonomıkalyq jaǵdaıdyń saldary. Kompanııa shyǵyndaryn azaıtý jáne ınvestorlardyń kóńilinen shyǵý úshin osyndaı qadamǵa baryp otyr. Bul qysqartý maǵan áser etken joq, biraq ókinishke qaraı jumystan bosaǵan tanystarym bar», – dedi ol.
«Bolashaqta Qazaqstanǵa oralasyz ba?», degen suraǵymyzǵa Ǵalymjan «Qazaqstanǵa oralatyn oıym bar. Bul jerdegi meniń basty maqsatym – tájirıbe jınaqtaý. Al bolashaq ómirimdi tek Qazaqstanda elestetemin», dedi.
Áńgime sońynda Ǵalymjan jetekshi IT uıymdarda qyzmet etýge nıetti jastarǵa keńes berdi. «Áleýmettik jelilerdi baqylaýǵa keńes beremin. О́ıtkeni túrli vakansııalar osy jelilerde keńinen taratylady. Máselen, Men Facebook rekrýteriniń habarlandyrýyn Linkedin-nen kórdim jáne oǵan kórsetilgen talaptaryna sáıkes keletinimdi jazdym. Osylaısha, men Facebook-pen baılanys ornatýǵa múmkindik aldym. Amazon kompanııasyna da mende joldama boldy. Osy oraıda, taǵy bir laıfhak – Big Tech-te jumys isteıtin adamdarmen sóılesý kerek, tanymasańyz da áleýmettik jelilerdiń múmkindigin paıdalanyp, baılanys ornatýǵa bolady. Iri kompanııalarda qyzmet etetin qandastarymyz kóp. Bul úlken jetistik. Áńgimelesýden ótý úshin aǵylshyn tilin bilý, algorıtmdik esepterdi sheshý daǵdysyna ıe bolý bolý mańyzdy. Sondaı-aq jeke daǵdylaryńyz da mańyzdy. Minez-qulqyńyzdy baqylaıtyn suhbat kezinde sizge «Jumys ornynda janjaldar boldy ma?», «Siz aýyr jumys júktemesin qalaı kóterdińiz?», degen suraqtar qoıylýy múmkin», dep bólisti ol.