Bul týraly Memleket basshysy Almaty qalasynyń jurtshylyǵymen kezdesýinde aıtty, dep jazady Egemen.kz.
«Almatynyń biregeı ornalasqan jeri taý týrızmin damytýǵa asa qolaıly. Biraq, taý týrızmi klasterin búkil Almaty aglomerasııasy sheńberinde qalyptastyrý qajet. Meniń oıymsha, Túrgen men Qaskeleń arasyndaǵy taý klasteriniń Shyǵys jáne Batys bólikterin osy jerlerdiń ákimshilik mártebesine qaramastan, keshendi túrde damytý kerek», dedi Prezıdent.
Qasym-Jomart Toqaevtyń Almatydaǵy kommýnaldyq júıeniń jumysy da kóńil kónshitpeıtinin atap ótti.
«Almatynyń tarıhı ortalyǵy – ómir súrý úshin asa qolaıly jer. Qajetti nárseniń bári jaqyn jerde ornalasqan. Alaıda, ortalyqtyń ózine tán túıtkilderi bar. Atap aıtqanda, kommýnaldyq júıe tozyp barady. Ǵımarattar bir-birine óte tyǵyz ornalasqan. Joldarda keptelis kóp.Sondaı-aq, shetkeri aýdandardyń damýy tym kenje qalyp otyr. Áleýmettik nysandar jetispeıdi. Jurt serýenge baratyn saıabaqtar tapshy. Negizinen jer úıler kóp salynǵan. Tipti, qys aılarynda qara tútin qaptaıdy», dedi Memleket basshysy.
Q.Toqaev Almatyda azamattardyń demalysyn paıdaly ótkizetin qoǵamdyq oryndar az. Kólik jáne ınjenerlik ınfraqurylym da jetkiliksiz ekenin aıtyp, ákimdikke eskertý aıtty.
«Ákimdiktiń basty mindetiniń biri – ortalyq pen shettegi aýdandardyń arasynda paıda bolǵan osy teńsizdikti joıý. Qala – bárine ortaq. Sondyqtan, qalanyń ıgilikteri de barlyq turǵyndarǵa birdeı qoljetimdi bolýǵa tıis», dedi Prezıdent.