Alakól aýdanyndaǵy «Úsharal-Dostyq» avtojolynda aýa raıynyń qolaısyzdyǵyna baılanysty qar qursaýynda qalǵan 9 adam evakýasııalandy, dep habarlaıdy Egemen.kz Jetisý oblysy TJD baspasóz qyzmetine silteme jasap.
«Búgin tańǵy saǵat 9.00-de «Yrǵaıty» ýchaskesinen 3 avtokóliktiń salonynan 9 adam qutqarylyp, Dostyq stansııasyna jetkizildi. Qutqarylǵandardyń eshqaısysyna medısınalyq kómek qajet bolmady», delingen habarlamada.
Esterińizge sala ketsek, 22 qańtar kúni saǵat 18.00-de aýa raıynyń nasharlaýyna baılanysty jol qyzmetterimen «Úsharal-Dostyq» respýblıkalyq mańyzy bar avtojolynda barlyq avtokólik túrleri úshin qozǵalysty jabý týraly sheshim qabyldandy.
Qar qursaýyna túsken avtokólikter jol jabylǵanǵa deıin osy avtojolǵa shyǵyp ketkeni anyqtaldy.