О́tken demalys kúnderi «Ońtústik» óńirlik qolbasshylyǵynyń áskerı qyzmetshileri Jambyl oblysy Turar Rysqulov aýdany ákimshiliginiń ótinishi boıynsha sý tasqynyna qarsy sharalardy oryndaýǵa jumyldyryldy, dep habarlaıdy Egemen.kz.
Atalǵan aımaqta kúnniń kúrt jylynýy men jaýǵan jańbyrdyń saldarynan eldi mekender men sharýashylyq qyzmet obektilerin sý basý qaýpi týyndady. Sý tasqynyna qarsy jumystarǵa Lýgovoı garnızonyndaǵy barlaý bólimshesi jáne motoatqyshtar batalonynan barlyǵy 300-ge jýyq áskerı qyzmetshi jumyldyryldy. Sonymen qosa áskerı tehnıka da tartyldy.
– Birden Qulan aýylynyń turǵyndaryna kómekke kirisip kettik. О́ıtkeni qıyn jaǵdaıda halyqqa qol ushyn berý – áskerı jáne azamattyq boryshymyz, – dep atap ótti Jaýyngerlik daıarlyq jónindegi barlaý bólimshesi komandıriniń orynbasary maıor Abzal Jánibekov.
Arnaıy tehnıkanyń kómegimen sý arnasyn basqa jaqqa burýdy tótenshe jaǵdaıdyń aldyn alý jónindegi organdar júrgizedi, al áskerı qyzmetshiler jınalǵan sýdyń úılerdi basýyna jol bermeý úshin bekinister salyp jatyr.
– Áskerılerdiń kelip, kómektesip júrgenine rızamyz. Olar eki kún qatarynan bizge qol ushyn berip, osynda júr, – dep alǵysyn bildirdi Rysqulov aýdany Qulan aýyldyq okrýginiń ókili Nurbolat Qoıshybaev.
Jumys aýysymmen uıymdastyrylǵan. Úılerdi sý tasqynynan qorǵaý úshin 50 adamnan quralǵan toptar qum salynǵan qapshyqtardan bóget jasap jatyr.
Qazir aýdandaǵy eldi mekenderdi sý basý qaýpi áli de seıilgen joq. Alaıda jaǵdaı baqylaýda.