Petropavldaǵy mektep oqýshysynyń balta men pyshaqpen jasaǵan shabýylynyń mán-jaıy belgili boldy. №4 mekteptiń oqýshysy shabýyldan qalaı aman qalǵanyn aıtyp berdi, dep habarlaıdy Egemen.kz Habar 24 telearnasyna silteme jasap.
«Men dárethanaǵa baraıyn dep esikti ashqanymda 9-synypta oqıtyn oqýshy baltamen ura bastady. Ol mektep formasyn jáne betperde kıgen. Qolynda balta men pyshaq boldy. Ol menimen qatar 9-synyptaǵy bala men 10-shy synyptyń qyzyna shabýyl jasady», dedi Vladıslav Gorbachenko.
Zardap shekken mektep oqýshysynyń aıtýynsha, jasóspirim únsiz shabýyl jasaǵan. Barlyǵy sanaýly mınýttarda bolǵan.
Zardap shegýshiniń anasy Vera Gorbachenko balasynyń basynan, moınynan jáne keýdesinen soqqy alǵanyn aıtty. Ol jasóspirimniń mektepke baltamen erkin barǵanyn aıyptady.«Ol mektepke sómkesine balta salyp, alyp barǵan. Mektepke kirer kezde oqýshylardyń sómkeleri tekserilmeıdi. Balalardyń sómkesin tintýge eshkimniń quqyǵy joq, muny ózderińiz jaqsy túsinesizder», dep túsindirdi Soltústik Qazaqstan oblysy bilim basqarmasynyń basshysy Názir Jáshibekov.
Petropavl qalasynyń prokýrory Arman Nurtazın atalǵan fakt boıynsha Qylmystyq kodekstiń 99-baby 2-bóliginiń 1.14-tarmaǵy «Adam óltirýge oqtalý» boıynsha sotaldy tergeý bastalǵanyn aıtty. Qazirgi ýaqytta kámeletke tolmaǵan bala ustalyp, onymen polısııa jumys istep jatyr.