Aqparat jáne qoǵamdyq damý mınıstri Darhan Qydyráli eldegi birqatar úkimettik emes uıymdardyń ókilderin marapattady. Dúnıejúzilik úkimettik emes uıymdar kúnine oraı uıymdastyrylǵan is-sharada Aqparat jáne qoǵamdyq damý mınıstri atalǵan uıymdar qyzmetiniń ereksheligin aıtyp ótti.
– Kez kelgen memlekettiń tiregi – azamattyq qoǵam. Úkimettik emes uıym ókilderi halyq pen bılik arasyndaǵy baılanysty nyǵaıtyp, qoǵamdyq dıalogtiń qalyptasýyna yqpal etedi. Memleket jyl saıyn áleýmettik mańyzy bar 2 myń jobany ÚEU-men ózara baılanys arqyly iske asyryp keledi. Júrgizilgen jumys nátıjesinde, 2022 jyly 500-den astam jumys orny quryldy, 32 myńnan astam benefısıar naqty kómek aldy, onyń ishinde 3000 erekshe qajettiligi bar, 60-tan astam áleýmettik qyzmet pen ortalyq quryldy, – dedi Darhan Qydyráli.
Mınıstrliktiń málimetterine súıensek, qazirgi ýaqytta elimizde 22 myńnan astam ÚEU tirkelgen, onyń 17 myńynan astamy belsendi jumys isteıdi. Sonymen qatar búginde azamattyq qoǵam ınstıtýttaryn damytý úshin mınıstrlik júıeli keshendi jumys júrgizip jatyr. Máselen, 2022 jyly 4 shildede volonterlik jáne qaıyrymdylyqty damytý máseleleri jóninde zań qabyldandy.
– Osydan biraz ýaqyt buryn Qoǵamdyq keńester máselesi boıynsha zańnamaǵa túzetýler engizildi. Osylaısha, olardyń qyzmet aıasyn kvazımemlekettik sektorǵa deıin keńeıtýge múmkindik berildi. Qoǵamdyq keńesterdegi azamattyq sektordyń úlesi 23,5 paıyzǵa artyp, qazirgi ýaqytta 86 paıyzdy qurady. Qoǵamdyq keńesterdiń quramy 90 paıyzǵa jańartyldy, – dedi mınıstr.
Saltanatty jıyn sońynda Aqparat jáne qoǵamdyq damý mınıstri Darhan Qydyráli úkimettik emes uıymdardyń ókilderine alǵys bildirip, marapattady.