Bıyl Indýstrııa jáne ınfraqurylymdyq damý mınıstrliginiń qoldaýymen elimizde 353 mlrd teńgege mańyzy bar 4 myń shaqyrym jolǵa jóndeý jumystary júrgiziledi. Bul jaıly IIDM Avtomobıl joldary komıteti tóraǵasynyń orynbasary Amangeldi Bekov málimdedi, dep habarlaıdy Egemen.kz.
«Osy jyly jergilikti mańyzy bar joldardaǵy qurylys, rekonstrýksııa jáne jóndeýge 353 mlrd teńge bólindi. Bólingen qarajat esebinen 4 myń shaqyrymǵa jumys júrgizý josparlanyp otyr», dedi komıtet ókili.
Mımnıstrlik mamany keltirgen málimetterge súıensek, 2022 jyly respýblıkalyq jeli boıynsha 11,6 myń shaqyrym jol jóndeý jumystarymen qamtylǵan. Onyń ishinde 4 myń shaqyrymynda qurylys jáne rekonstrýksııa eskerilgen. Sonyń 1,2 myń shaqyrymynda negizgi jumystar aıaqtaldy. Kúrdeli jáne ortasha jóndeýmen 3 myń shaqyrym jol qamtylyp, onyń 679 shaqyrymy tapsyrylǵan.
Al ótken jyly Respýblıkalyq jeli boıynsha 11.6 myń jol jumystarymen qamtylǵan. Sonymen qatar byltyr jergilikti avtojoldar jelisinde jóndeýdiń barlyq túrlerimen 4,6 myń shaqyrym jol qamtyldy, onyń ishinde 3 myń shaqyrymy paıdalanýǵa berilgen.
Jyl qorytyndysy boıynsha normatıvtik jaǵdaıdaǵy joldardyń úlesi respýblıkalyq jeli boıynsha 91 paıyzǵa deıin, al jergilikti jeli boıynsha 85 paıyzǵa deıin ulǵaıtylǵan.
Aldaǵy ýaqytta mınıstrlik tarapynan respýblıkalyq mańyzy bar iri 3 joba júzege asyrylady. Atap aıtqanda, uzyndyǵy – 521 shaqyrymdy quraıtyn Oral qalasynyń ońtústik-batys aınalma joly boıynsha «Atyraý-Oral» baǵyty, 513 shaqyrymdy quraıtyn «Jezqazǵan-Qaraǵandy» baǵyty jáne 262 shaqyrym bolatyn «Aqtóbe-Ulǵaısyn» baǵyty.
Sonymen birge jol-jóndeý jumystarynyń sapasy jáne avtojoldardyń búgingi jaı-kúıin dıagnostıkalaýǵa qatysty zańnamada birqatar túzetýler qabyldanǵany belgili boldy. Endi eldi meken kóshelerin jóndeýge vedomstvolyq saraptama júrgizý ókilettigi Ulttyq sapa ortalyǵyna beriledi.
Sonymen birge zańnamada jol boıyndaǵy qyzmet kórsetý nysandaryn salý úshin jer berý rásimin ońaılatý jónindegi máseleleri de pysyqtalyp jatqandyǵy aıtyldy.
«Qazirgi tańda respýblıkalyq mańyzy bar avtomobıl joldarynyń boıynda 1 634 nysan bar. Sonyń 74%-y Ulttyq standart talaptaryna saı keledi. Bıyl taǵy 78 qyzmet kórsetý nysanyn iske qosý kózdelgen, onyń 53 obektisi jeke ınvestısııalardy tartý esebinen jáne rekonstrýksııalaý men jóndeý sheńberinde 25 sanıtarlyq-gıgıenalyq torap qoıylmaq», dedi Amangeldi Bekov.
Elimizdegi avtomobıl joldarynyń jalpy uzyndyǵy 96 myń shaqyrymdy qurap otyr. Sonyń 25 myń shaqyrymy – respýblıkalyq mańyzy bar joldar, al 71 myń shaqyrymy oblystyq jáne aýdandyq mańyzy bar joldar sanatynda. Respýblıkalyq mańyzy bar joldar Indýstrııa jáne ınfraqurylymdyq damý mınıstrligi Avtomobıl joldary komıtetiniń qaramaǵynda.
Memlekettik tapsyrys aıasynda damytý jáne kútip-ustaý jónindegi jumystardy uıymdastyrýdy Ulttyq operator «QazAvtoJol» Ulttyq kompanııasy júzege asyrady. Al oblystyq jáne aýdandyq mańyzy bar avtojoldardy, sondaı-aq kóshe-jol jelisi jergilikti atqarýshy organdardyń qaraýynda.