Túrkııada 14 mamyrda ótetin saılaýǵa qatysý úshin qandasymyz Rashıda Iýksel Parlament depýtattyǵyna kandıdat retinde tirkeldi. Ol qazirge deıin Ystanbuldaǵy Zeıtin-býrný aýdandyq máslıhatynda depýtat, bıliktegi «AK Parti» partııasynyń áıelder isi jónindegi komıtetiniń múshesi boldy. Bıylǵy saıası dodada osy AK partııasy atynan mandattyq talasqa túspek.
Qazirgi kúni Rashıda Iýksel jergilikti saılaý zańnamasyna sáıkes Túrkııa Uly Ulttyq májilisine depýtat bolý úshin úsh kezeńnen turatyn irikteýden ótken. Endi sońǵy kezeńde partııalyq tizim boıynsha kimniń depýtat bolatynyn partııa tóraǵasy, ıaǵnı el Prezıdenti bekitedi.
«Ystanbulda úsh ýchaske boıynsha 98 adam Parlament depýtaty bolady. Saılaý qorytyndysy boıynsha osy oryndar partııalar arasynda bólinedi. Eger men saılanatyn bolsam, 70 jyldan beri Túrkııa Parlamentine ótken tuńǵysh qazaq bolmaqpyn. Sondyqtan qazaqstandyq baýyrlarym da maǵan tileýles bolsa deımin. Eger depýtat bolsam, eń aldymen baýyrlas eki el Qazaqstan men Túrkııa arasyndaǵy qarym-qatynasty nyǵaıtýǵa barynsha kúsh salamyn», dedi Túrkııa Parlamenti depýtattyǵyna úmitker Rashıda Iýksel.
Rashıda Iýkseldiń negizgi mamandyǵy dáriger. Zeıtin-býrný aýdanynda dúnıege kelgen. 400 myńǵa jýyq adam turatyn bul aýdanda qazaqtar kóp shoǵyrlanǵan. Rashıda Iýksel osy jerdegi qazaqtar arasynan shyqqan tuńǵysh áıel dáriger jáne máslıhat depýtaty eken.
«Ákeme munda jer men úı beripti. Osy jaqta ákem «balalarym oqýy kerek» dep bizdi oqýǵa berdi. Úıde jeti aǵaıyndymyz. Ata-anamyz bárimizdi oqytty. Bul jaqta qyzdar oqymaıtyn. Ákemniń arqasynda men qazaqtan shyqqan tuńǵysh dáriger qyz boldym. 27 jyl dáriger bolyp, 2014 jyly zeınetke shyqtym», deıdi Rashıda Iýksel.
Zeınetke shyqqan soń ol aýdannyń qoǵamdyq ómirine belsene aralasyp, bıliktegi «AK Parti» partııasynan saılaýǵa qatysyp, máslıhat depýtaty atanady. Buǵan qosa, partııanyń áıelder isi jónindegi komıssııasynyń múshesi.