Áleýmettik jelilerde AQSh-ta turatyn Qazaqstan azamatyna qaraqshylardyń shabýyl jasaǵany, al otandasymyzdyń olarǵa toıtarys berip, qarýlaryn tartyp alǵany túsirilgen beınejazba jarııalandy. Oqıǵa jelisin keıipker – Oljas Qanybek Instagram paraqshasynda baıandady. Syrtqy ister mınıstrligi de osyǵan qatysty resmı málimet berdi.
Oqıǵa AQSh-tyń Maıamı qalasynda bolǵan. Jergilikti úsh adamnan quralǵan top Oljas Qanybekke tapansha kezep, sómkesin tartyp almaqshy bolǵan. Oljastyń aıtýynsha, sómkesinde qujattary, telefony men aqshasy bar eken. Ol buzaqylardyń birine qýyp jetip, qarýyn tartyp alǵan. Qaraqshynyń eki dosy ony bosatý úshin qaıta oralǵan eken. Qarýly qaraqshylar oǵan shabýyl jasaǵan. Alaıda Oljas qarsylyq kórsetip, olardyń da qarýlaryn tartyp alǵan. Keıin qaraqshylar oqıǵa ornynan izin sýytqan.
Kóp uzamaı oqıǵa ornyna polıseıler keledi. Qaraqshylardy izdeýge 6 polısııa kóligi men tikushaq shyqqan. «Betime tapansha taqaǵanda qorqyp kettim. Biraq qaraqshylarǵa syr aldyrǵan joqpyn. Kelgen polısııa qyzmetkerleri de «ne degen júreginiń túgi bar jigitsiń» dep tańǵalyp jatyr», deıdi Oljas Qanybek.
Oqıǵa ornyna psıhologter men dáriger de kelip, Oljastyń jaǵdaıyn tekseripti. Sondaı-aq kıimderin DNQ saraptamasyna tekserýge jibergen. «Qazaq jigiti qaraqshylardan tapansha pen avtomatty tartyp alǵan, ózderin uryp-soqqan, biriniń tisin syndyrǵan. Mundaıdy AQSh-ta buǵan deıin eshkim kórmegen», deıdi polıseılerdiń biri.
Oljastyń aıtýynsha, oqys jaǵdaı kútpegen jerden bolǵan. Ol jarnama bólimine baryp, telefonyndaǵy arnaıy qosymshany jańartpaq bolǵan eken. Alaıda ony tapanshamen úsh jigit kútip alǵan.
Elimizdiń AQSh-taǵy konsýldyǵy Oljaspen baılanysqa shyqqan. «Bizdiń konsýl Qazaqstan azamatyn taýyp, onymen jáne jergilikti quqyq qorǵaý organdarymen baılanysty. Tóbeles barysynda kishigirim jaraqat alǵanyna qaramastan, Oljas em qabyldaýdan bas tartty. Onyń densaýlyǵyna esh qaýip joq. Aman-esen», dedi SIM resmı ókili Aıbek Smadııarov.
SIM málimeti boıynsha Oljas Qanybek AQSh-qa 2 aılyq oqýǵa barǵan. Ol Latvııada aeronavıgasııa ınstıtýtynda oqyǵan. Mamandyǵy – avıadıspetcher. Kezinde bokspen de aınalysqan eken. 24 jastaǵy otandasymyz – Kentaý qalasynyń týmasy. «Buryn munaı-gaz salasynda jumys istedim. Keıingi ýaqytta avıasııa salasynda oqyp júrmin. «Qazaeronavıgasııa» kompanııasy ushýdy praktıkalyq túrde úırený úshin AQSh-qa oqýǵa jiberdi. Qazir Maıamı qalasyndamyn», deıdi Oljas Qanybek.