Qazaqstanda kóktemgi egis jumystaryn júrgizý úshin sharýalarǵa 257 myń tonna tyńaıtqysh jóneltildi, onyń 144 myń tonnasy otandyq tyńaıtqysh óndirýshi kásiporyndardyń ónimi.
Fermerlerdiń mıneraldy tyńaıtqyshtarmen qamtamasyz etilýi jaıly aýyl sharýashylyǵy vıse-mınıstri Ábilhaıyr Tamabek baıandady. Onyń aıtýynsha, qazir qoımalarda 88 myń tonna qor bar. Jalpy aǵymdaǵy egis jumystaryna 704 myń tonnaǵa jýyq tyńaıtqysh paıdalaný josparlanyp otyr, onyń 63%-y qazaqstandyq óndiriske tıesili.
Jergilikti bıýdjetterde tyńaıtqyshtardy sýbsıdııalaý baǵdarlamasyna 31,3 mlrd teńge qarastyrylǵan. Aýyl sharýashylyǵy daqyldaryn zııankester men aramshópterden qorǵaý úshin sýbsıdııalaý sheńberinde 32,6 mlrd teńge bólingenin qosa málimdedi vıse-mınıstr.
Sondaı-aq keńeste óńirlerge JJM jóneltý máselesi de qaraldy. Kóktemgi egis naýqanyna bólingen jeńildetilgen dızel otynynyń kólemi ulǵaıtylyp, 419 myń tonnaǵa jetti, bul ótken jylǵy deńgeımen salystyrǵanda 19 myń tonnaǵa artyq. Operatorlardyń shyǵystaryn eskere otyryp, respýblıka boıynsha aýyl sharýashylyǵy taýaryn óndirýshiler úshin dızel otynynyń ortasha quny lıtrine 204 teńgeni quraıdy, bul dızel otynynyń shekti baǵasynyń ósýine sáıkes, naryqtyq qunynan 30%-ǵa arzan. О́ńirler belgilengen janarmaı kóleminiń 47%-yn aldy.
Egis naýqanyn qarjylandyrýǵa keletin bolsaq, «Keń dala» baǵdarlamasy boıynsha 140 mlrd teńge qarastyrylǵan, oǵan keminde 3200 sharýany qamtý, shamamen 2 mln ga alqapta egin egý men jınaýdy qamtamasyz etý josparlanǵan. Qazirgi ýaqytta 150,8 mlrd teńgege 4169 ótinim kelip tústi. О́nimdi forvardtyq satyp alý baǵdarlamasy jalǵasady, oǵan 20 mlrd teńge qarastyrylǵan. Azyq-túlik korporasııasy kóktemgi egis jumystaryn iske asyrý jáne keıinnen qarjylandyrý úshin iri aýyl sharýashylyǵy taýaryn óndirýshilerge taýarlyq nesıe berýge taǵy 35 mlrd teńge bóledi.
Aıta keteıik, kóktemgi egis jumystary bastalǵannan beri Qazaqstannyń ońtústik óńirlerinde dıqandar 832,9 myń ga jerge egin ekti, olardyń basym bóligi dándi, jemshóp jáne maıly daqyldar. Jalpy búkil el boıynsha 23,4 mln ga jerge egin egý josparlanyp otyr. Bıyl dándi, jemshóp, kókónis jáne baqsha daqyldarynyń, sondaı-aq qant qyzylshasynyń egistik alqaptary ulǵaıady. Jappaı egý naýqany mamyrdyń ekinshi onkúndiginde bastalady.
Barlyq túıtkildi máselelerdi jedel sheshý úshin Aýyl sharýashylyǵy mınıstrligi janynda Jedel shtab jumys isteıdi, oǵan barlyq múddeli memlekettik organdar men uıymdar, sondaı-aq oblystar men qalalar ákimderiniń orynbasarlary tartylǵan.