Aqparat jáne qoǵamdyq damý mınıstri Darhan Qydyráli Astanada ótip jatqan Qazaq Forum otandyq kontent jasaýshylar forýmy barysynda jýyrda jańa medıanyń damýyna serpin beretin jıyn ótetinin aıtty, dep habarlaıdy Egemen.kz.
«Álemdegi sońǵy úrdisterdi eskere otyryp, jańa sıfrlyq medıa men kreatıvti ındýstrııany damytý jónindegi jumystardy jandandyrýdy kózdep otyrmyz», dedi mınıstr.
Darhan Qydyráliniń aıtýynsha, vedomstvo Meta, TikTok, Google, Mail.Ru Group, LinkedIn, Netflix kompanııalarymen kelissóz júrgizip, tyǵyz qarym-qatynas ornatqan.
Kelissózder nátıjesinde Meta kompanııasynyń Instagram, Whatsapp, Facebook-tiń Qazaqstan boıynsha resmı ókilderi aıqyndaldy. Sondaı-aq TikTok korporasııasynyń aımaqtyq ofısi ashyldy. Facebook pen TikTok-tiń ınterfeısin qazaqshalaý boıynsha kelisimder jasalǵan.
«TikTok kompanııasymen 13 jasqa tolmaǵan balalardyń platformany paıdalanýyn jáne zııandy mazmundy kontentterdi birlesip anyqtaıtyn bolamyz. Munyń bári bizge úlken jaýapkershilik júkteıdi», dedi Darhan Qydyráli.