Osydan bir jyl buryn Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń qoldaýymen «Samuryq-Qazyna» qory «Genderlik teńdik» baǵdarlamasyn ázirledi. Nátıjesinde, qorǵa qarasty mekemelerdiń basshylyq laýazymdaǵy qyz-kelinshekteri oqytý kýrsynan ótip, kóshbasshy áıelder pýlyna endi. Astanada kvazımemlekettik sektorynda áıel basshylardy daıarlaý boıynsha «Genderlik teńdik» baǵdarlamasynyń bitirý rásimi ótti. Saltanatty jıynda kýrsty sátti aıaqtaǵandarǵa Berklı ýnıversıtetiniń sertıfıkaty tapsyryldy.
Jeti aıǵa sozylǵan «Genderlik teńdik» baǵdarlamasyn 70 áıel sátti aıaqtaǵan. Olarǵa oqýdy tabysty aıaqtaǵandary úshin arnaıy sertıfıkat pen gúl shoqtaryn Prezıdent Ákimshiligi Basshysynyń orynbasary, Prezıdent janyndaǵy áıelder isteri jáne otbasylyq-demografııalyq saıasat jónindegi ulttyq komıssııa tóraǵasy Aıda Balaeva men «Samuryq-Qazyna» AQ basqarma tóraǵasy Nurlan Jaqypov tabys etti.
– Jalpy, «Samuryq-Qazyna» qory gender teńdigi boıynsha memleket saıasatyn belsendi qoldaıdy. Biz kompanııalarymyzdyń basqarý organdarynda áıelder sanyn arttyrý boıynsha mindetteme aldyq. Onyń júzege asýyn qadaǵalap kelemiz. Qazir qorda 259,5 myń adam, onyń ishinde 72 myńǵa jýyq áıel jumys isteıdi. Bul jalpy qyzmetkerlerdiń 28 paıyzyn quraıdy. Bólim basshylarynan bastap eseptegende, shamamen 8,5 myń áıel basshylyq qyzmette. Bul – barlyq áıelder sanynyń úshten biri. Al joǵary basshylyq qyzmetterdegi áıelder úlesi – bar bolǵany 15 paıyz. Bizdiń maqsat – olardyń úlesin 2030 jylǵa qaraı 30 paıyzǵa deıin arttyrý, – dedi «Samuryq-Qazyna» AQ basqarma tóraǵasy Nurlan Jaqypov kóshbasshy áıelderdi quttyqtaý sózinde.
Prezıdent Ákimshiligi Basshysynyń orynbasary, prezıdent janyndaǵy áıelder isteri jáne otbasylyq-demografııalyq saıasat jónindegi ulttyq komıssııa tóraǵasy Aıda Balaeva genderlik teńdik máselesine Memleket basshysy kóp kóńil bólip otyrǵanyn atap ótti.
– Ulttyq komıssııa qoǵamdyq negizde jumys isteıtin jáne belgili bir salanyń damýyna jáne qoǵamnyń ózekti máselelerin sheshýge úlken úles qosatyn óte belsendi jáne perspektıvaly áıelderden turady. Búginde Áıelder qozǵalysy jańa jarqyn ókildermen jáne kóshbasshylarmen tolyqtyrylyp keledi. Sizderdiń árqaısyńyzdyń qazaqstandyq qoǵamdaǵy áıelderdiń jaǵdaıyn jaqsartýǵa yqpal etetin óz ıdeıalaryńyz, bastamalaryńyz, jobalaryńyz bar ekenine senimdimin. Áıelderdi ártúrli kompanııalardyń Dırektorlar keńesine qosýdy kózdeıtin búgingi jobamyz biregeı, – dedi Aıda Balaeva.
Dúnıejúzilik banktiń málimetinshe, sarapshylar basshylyq qyzmettegi áıelderdiń úlesin bir paıyzǵa arttyrý aktıvterdiń tabysyn 14 paıyzǵa, al kapıtaldy 25 paıyzǵa arttyratynyn dáleldegen. Osy oraıda, «biz áıelderdi basshylyq qyzmetterge taǵaıyndaý arqyly, tek genderlik teńdikti saqtap qana qoımaı, tabysty arttyrýdyń utymdy jolyn taýyp otyrmyz», deıdi baǵdarlama uıymdastyrýshylary.
– Baǵdarlamaǵa qatysýǵa elimiz boıynsha qorǵa qarasty kompanııalardan basshylyq qyzmettegi 142 áıel ótinish bildirdi. Biz «Samuryq-Qazyna» tobynyń dırektorlar keńesi men baqylaýshylar keńesin qalyptastyrý erejesine sáıkes bir ǵana talap qoıdyq, ol – úmitkerdiń basshylyq qyzmettegi jumys ótili 5 jyldan kem bolmaýǵa tıis. Qatysýshylardyń bári esse jazyp, test tapsyrdy, osylaısha irikteýden 80-i ótti, – dedi qordyń Qoǵammen baılanys, áleýmettik-eńbek qatynastary jáne eńbekti qorǵaý jónindegi basqarýshy dırektory Ǵıbrat Aýǵanov.
Ǵıbrat Aýǵanovtyń aıtýynsha, birneshe oqý modýlinen turatyn kýrsta, naqty bıznes keıster men kompanııalardyń esepteri qaralǵan. Kýrsty aıaqtaǵan áıel qyzmetkerler kóshbasshy áıelder pýlyna endi. Sondaı-aq olar bolashaqta «Samuryq-Qazyna» tobynyń dırektorlar keńesi men baqylaýshylar keńesine múshe retinde qarastyrylady. Buǵan qosa 15 áıel memlekettik komıssııalardyń, al 10-y memlekettik kompanııalardyń basqarýshy organdaryna sarapshy bolyp endi.
– Kýrsta biz dırektorlar keńesinde qalaı jumys isteý kerek, ózin-ózi ustaý, basqarý, emosııalardy qadaǵalap, onyń jeteginde ketpeýdiń tásilderin úırendik. Kommýnıkasııa, erlermen birge máseleni sheshý daǵdylaryn da meńgerdik, – dedi qorǵa qarasty kompanııa dırektorynyń orynbasary Aqmaral Jaýbaeva.
Qor aldaǵy ýaqytta da qajettilik bolǵan jaǵdaıda joba aýqymyn keńeıtip, odan ári damytýǵa daıyn ekenderin aıtady.