Memleket basshysynyń Jarlyǵymen Ekinshi dúnıejúzilik soǵysta kórsetken erligi men janqııarlyǵy úshin birqatar ardager marapattaldy. Onyń biri – bıyl 100 jasqa kelgen, Jeńis paradyna qatysýshy Ivan Gapıch. Jeńis kúni qarsańynda ardagerge «Halyq qaharmany» ataǵy berilip, aıryqsha erekshelik belgisi – «Altyn Juldyz» ben «Otan» ordeni tapsyryldy.
Ekinshi dúnıejúzilik soǵys jáne eńbek ardageri Ivan Gapıch 1923 jyly 2 aqpanda Aqmola qalasynda dúnıege kelgen. Polsha, Chehoslovakııa, Ýkraınany azat etýge qatysty. Búkil soǵysty bastan ótkizgen maıdanger fashısterdiń garnızondary men komendatýralaryn talqandaǵan, oq-dári jáne azyq-túlik qoımalaryn joıǵan otrıadtyń jaýyngerlik operasııalaryna qatysqan.
Ardager «Qyzyl Juldyz» jáne III dárejeli «Dańq» ordenderimen, «Erligi úshin», «Jaýyngerlik eńbegi úshin», «Kenıgsbergti alǵany úshin», «Germanııany jeńgeni úshin» medaldarymen, «Prokýratýranyń qurmetti qyzmetkeri» tósbelgisimen, I, II, III dárejeli «Eren eńbegi úshin» medaldarymen, «Qurmet» ordenimen, II dárejeli «Dańq» ordenimen marapattalǵan. Ol sondaı-aq Batys Qazaqstan oblysynyń qurmetti azamaty. 1945 jyly 24 maýsymda Qyzyl alańda ótken Jeńis paradynyń qatysýshysy.
Jeńisti jaqyndatqan maıdanger surapyl soǵystyń otty jyldarynan ótti. Kenıgsbergti azat etýge atsalysty. Ol Polshany, Chehoslovakııany, Ýkraınany azat etýge qatysty. Maıdanger fashısterdiń garnızondary men komendatýralaryn talqandaǵan, oq-dári jáne azyq-túlik qoımalaryn joıǵan jasaqtyń jaýyngerlik operasııalaryna qatysty. Osydan 78 jyl buryn Máskeýdegi áskerı sherýge qatysyp, Jeńisti Berlınde qarsy aldy. Soǵystan keıin ol Almaty zań ýnıversıtetin támamdap, Qaraǵandyda prokýratýra organynda eńbek jolyn bastady.
Ǵasyrdan asqan qarııa 1966 jyly Batys Qazaqstan oblysynyń prokýrory Smaǵulovtyń shaqyrýymen osy óńirge keledi. Sodan 1987 jylǵa deıin Oral, keıin Batys Qazaqstan oblysy prokýrorynyń birinshi orynbasary bolyp istep, keıin qurmetti zeınetke shyǵady. Prokýratýra organynda attaı 35 jyl eńbek etken Ivan Gapıchke osy jyldarda asa qıyn da kúrdeli isterdiń aq-qarasyn aıyrýǵa týra keldi.
Búginde jastarmen kezdesip, Otan aldyndaǵy boryshy týraly aıtýdan sharshamaı kele jatqan ardager «Ǵasyr jasaımyn dep esh oılamaǵan edim» deıdi. Aıta keteıik, maıdangerdiń júz jyldyq mereıtoıy qarsańynda «Ivan Gapıch. Namys pen paryzdyń adamy» atty kitap jaryq kórgen bolatyn.