Úkimet basshysy Álıhan Smaıylovtyń orta bıznes ókilderimen ótkizgen kezdesýinde óńdeý ónerkásibin damytýǵa qatysty aýqymdy máseleler qaraldy.
Jıynǵa Astana, Almaty jáne Shymkent qalalarynyń kásipkerleri, «Atameken» UKP, sondaı-aq mınıstrler, qala ákimderiniń orynbasarlary men kásipkerlik bastamalardy damytýǵa jáne memlekettik qoldaýǵa jaýapty kvazımemlekettik sektor basshylary qatysty.
Naýryzda VIII saılanǵan Parlamenttiń birinshi sessııasynyń ashylýynda Memleket basshysy elimizge ekonomıkany damytý jolynda ózderine jaýapkershilik ala alatyn kásipkerlerdiń «jańa tolqyny» qajet ekenin atap ótti.
«Orta bıznesten zor úmit kútip otyrmyz. Ol básekege qabiletti ónim shyǵaratyn jáne keń aýqymdy qyzmet kórsetetin óńdeýshi sektordyń qozǵaýshy kúshine ári draıverine aınalýǵa tıis», dep atap ótti Álıhan Smaıylov.
Kezdesý barysynda qatysýshylar qarjylandyrýdyń qoljetimdiligin qamtamasyz etý, ónim kólemin ulǵaıtý, ımportty almastyrý jáne jańa óndiris oryndaryn damytý, memlekettik qoldaý baǵdarlamalaryn júzege asyrý, memlekettik satyp alý, salyq salý, sertıfıkattaý, ındýstrııalyq aımaqtar men ındýstrııalyq parkterdi damytý, ınnovasııalardy engizý, eksport, jumys oryndaryn qurý, kadr daıarlaý jáne taǵy basqa máselelerdi talqylady.
Premer-mınıstrdiń orynbasary – Saýda jáne ıntegrasııa mınıstri Serik Jumanǵarın, Indýstrııa jáne ınfraqurylymdyq damý mınıstri Marat Qarabaev, Ǵylym jáne joǵary bilim mınıstri Saıasat Nurbek, Densaýlyq saqtaý mınıstri Ajar Ǵınııat ózekti máselelerge toqtaldy.
Premer-mınıstr memlekettik organdarǵa bıznes qaýymdastyǵymen birge kóterilgen barlyq máselelerdiń sheshimin pysyqtaý úshin tapsyrma beriletinin aıtty.
Ol álemdik tájirıbe kórsetip otyrǵandaı, orta bıznes únemi ózgerip otyratyn naryqtyq jaǵdaılarǵa tez beıimdeletinin atap ótti. Bul ony óz kezeginde ekonomıkalyq damýdyń asa mańyzdy baǵdaryna aınaldyrady. Sol sebepti damyǵan elder shaǵyn kásiporyndardy álemdik naryqtaǵy pozısııasyn keńeıtip, nyǵaıtýǵa belsendi túrde yntalandyryp otyrady.
«Mysaldy alystan izdeýdiń qajeti joq. «Samsung», «Toyota» nemese «Hyundai» sııaqty kompanııalar shaǵyn jáne orta bıznes retinde óz jolyn bastaǵan, al búgin olardy tabysty álemdik kóshbasshylar retinde bilemiz. О́z kezeginde Úkimet bıznestiń damýyna qajetti barlyq sharalardy qabyldap jatqanyna sendirgim keledi», dedi Álıhan Smaıylov.
Úkimet basshysy júktemeni azaıtyp, salyqtyq ákimshilendirý rásimderin jeńildetýdi kózdeıtin jańa Salyq kodeksi ázirlenip jatqanyn aıtty.
Sonymen qatar kásipkerlerdiń quqyqtaryn odan ári qorǵaý maqsatynda «taza paraqtan» retteý normasy engizilýde. Onyń aıasynda bızneske qoıylatyn 10 myń negizsiz talap alynyp tastalady jáne memlekettik baqylaýdyń barlyq baǵyty boıynsha rásimder avtomattandyrylady.
«Bul jańa jyldan bastap bıznesti tekserýge moratorıı aıaqtalǵannan keıin adamı faktorsyz, táýekelderdi basqarýdyń avtomattandyrylǵan júıeleri negizinde barlyq tekserý kestelerin qalyptastyrýǵa múmkindik beredi. Bul tekserýler sanyn azaıtyp, memlekettik baqylaýdyń tıimdiligin arttyrady», dedi Premer-mınıstr.
Sondaı-aq ol Memleket basshysynyń tapsyrmasyna saı, memlekettik resýrstar men ınfraqurylymǵa qoljetimdilikti jeńildetý maqsatynda memlekettik-jekemenshik áriptestiktiń jańa modeli ázirlengenin aıtty. Jergilikti deńgeıde jer telimderin bólý, ınfraqurylym jáne ákimdikterdiń quzyretine jatatyn basqa da máseleler boıynsha da qoldaý kórsetý jalǵasa beredi.
«Negizgi kapıtalǵa ınvestısııa tartý jáne jańa jumys oryndaryn qurý boıynsha ákimdikterge qoıylǵan naqty KPI bar. Bul rette ShOB sýbektilerinen túsetin korporatıvtik tabys salyǵy jergilikti bıýdjetke berildi, sol sebepti ákimdikter jeke sektordy keńeıtýge múddeli. Úkimet árqashan bıznespen dıalogke ashyq jáne onyń damýyna yqpal etetin jobalarǵa qoldaý kórsetýge daıyn ekenin taǵy da atap ótkim keledi», dep túıindedi Álıhan Smaıylov.