Ulttyq mýzeıde ótken «Mýzeı túni» halyqaralyq aksııasyna barlyǵy 47 myńnan astam adam bardy. Osylaısha, ótken jylǵy rekord jańartyldy. Byltyr bul is-sharaǵa 30 myńǵa jýyq adam qatysqan edi. Bul týraly Mádenıet jáne sport mınıstri Ashat Oralov áleýmettik jelidegi paraqshasynda jazdy, dep habarlaıdy Egemen.kz.
«Eń aldymen kózge túskeni, mýzeıge kireberistiń árqaısysynda birneshe metrlik kezek pen kelýshilerge lyq toly zaldar. Aýa raıy men keshki ýaqyt ekenine qaramastan, adamdar otbasylarmen kelip jatty. Al aýdany 74 myń sharshy metrdi quraıtyn jáne 200 myńnan astam eksponaty bar eldegi eń úlken mýzeı barlyq tilek bildirýshilerdi áreń ornalastyrdy, al keıbir zaldarda ıne shanshar jer qalmady. Soǵan qaramastan, mýzeıdegi atmosfera erekshe, naǵyz otbasylyq jáne shynymen merekelik boldy», dep jazdy mınıstr Instagram paraqshasynda. Ashat Oralov is-sharaǵa jınalǵan kelýshilerge quttyqtaý sóz sóılep, sodan keıin Ulttyq mýzeı qyzmetkerlerin kásibı merekemen jáne aldaǵy mádenıet jáne óner qyzmetkerleri kúnimen quttyqtady. Esterińizge sala keteıik, «Mýzeıler túni» — otandyq mádenı qyzmetkerler kúnin merekeleýge arnalǵan is-sharalar baǵdarlamasynyń bir bóligi. Saltanatty rásim barysynda mınıstr elimizdiń ár óńirinen kelgen úzdik mýzeı qyzmetkerlerin «Mádenıet salasynyń úzdigi» tósbelgisimen marapattady. Ulttyq mýzeı qabyrǵasynda konserttik jáne oıyn-saýyq baǵdarlamalary, oıyndar, kvestter, dárister, mýzeı restavratorlarynyń sheberlik sabaqtary, qolónershiler jármeńkesi, teatrlandyrylǵan ekskýrsııalar jáne birden birneshe ekspozısııa uıymdastyryldy. Kelýshiler «Mýzeıler túnine» arnaıy daıyndalǵan kitaptar men avtorlyq qýyrshaqtar kórmesin tamashalady, sondaı-aq belgili tarıhshylar men basqa da tanymal tulǵalar ekskýrsııalar ótkizgen «Juldyzdy gıd» jobasyna qatysty. Myńdaǵan kelýshilermen birge Ashat Oralov birneshe zaldy aralap, olarda usynylǵan eksponattarmen tanysty. Atap aıtqanda, jaqynda ashylǵan Paleontologııa zaly qonaqtar arasynda erekshe tanymal boldy. Sondaı-aq mınıstr medıamenedjer Armanjan Baıtasov júrgizgen «juldyzdy» ekskýrsııaǵa bardy. Is-sharada basqa elderden kóptegen qonaqtar boldy.
«Bul qazaqstandyqtardyń óz mádenıetine, tarıhyna jáne ónerine degen qyzyǵýshylyǵynyń artyp kele jatqanyn kórsetedi. Bizdiń mindetimiz — osyndaı is-sharalar arqyly adamdarǵa elimizdiń rýhanı murasyn qoljetimdi etý», dep atap ótti Mádenıet jáne sport mınıstri.