Mádenıet jáne sport mınıstrliginiń «Qazaqanımasııa» shyǵarmashylyq birlestigi otandyq 10 anımasııalyq stýdııamen birge túrkitildes elderge ortaq ejelgi ańyzdarǵa negizdelgen qanatqaqty anımasııalyq jobanyń óndirisin bastady.
Joba aıasynda Ahmet Iаsaýıdiń balalyq shaǵy, Qojanasyrdyń tapqyrlyǵy men mıftik jaratylystar týraly anımasııalar túsiriledi. Anımasııalyq almanahqa kiretin týyndylar ssenarıine úsh aı buryn konkýrs jarııalanǵan bolatyn. Avtorlarǵa shyǵarmanyń kórkemdik deńgeıiniń joǵary bolýy men ótken tarıhty búgingi kúnmen baılanystyra bilýi basty talap retinde qoıylǵan. Konkýrsqa túrkitildes elderdiń uly tulǵalary, qasıetti janýarlary men jer-sý ataýlary, túrkitildes elderdiń ortaq merekeleri men ulttyq oıyn-saýyqtary týraly ańyzdar negizinde jazylǵan 26 stýdııadan 40 ssenarıı kelip túsken. Arnaıy uıymdastyrylǵan baıqaý nátıjesinde «Úsh Arys», «Shyraq batyr men búrkit jaıly ańyz», «Leıla. Túrki Patshaıymynyń qupııasy», «Ashına – birinshi kóktúrik», «Turan», «Altyn kól», «Ahmet», «Qojanasyr jáne ury», «Sýyndar» jáne «Jumaq degenimiz...» atty 10 anımasııalyq joba qoldaýǵa ıe boldy. Ár anımasııanyń hronometrajy 5 mınýttan asady.
– О́ndiriske jiberilgen pılottyq anımasııalyq jobalar janr jaǵynan da, taqyryp boıynsha da bir-birine uqsamaıdy. Árqaısysy ózindik ereksheligimen daralanady. Bul joba túrkitildes memleketter arasyndaǵy yntymaqtastyqty nyǵaıtyp qana qoımaı, qazaqstandyq stýdııalarǵa jańa naryqtarǵa shyǵyp, kórermen aýdıtorııasyn keńeıtýge múmkindik beredi. Sondaı-aq bul bolashaqta baýyrlas eldermen birlesken anımasııalyq jobalar jasaýdyń alǵashqy qadamy, – dedi MSM Mádenıet komıteti tóraǵasynyń mindetin atqarýshy Kúmis Seıitova.