Jýyrda AQSh-taǵy Kalıfornııa shtatynyń San-Fransısko qalasynda Silkroad Innovation Hub-tyń resmı ashylýy ótti. Bul – Ortalyq Eýrazııany Kremnıı alqabyndaǵy birtutas aımaq retinde ilgeriletýge, sondaı-aq IT kásipkerlik salasyndaǵy yntymaqtastyqqa jáne faýnderlerdiń myqty qaýymdastyǵyn qurýǵa baǵyttalǵan biregeı joba. Onyń ashylýyna elimizdiń Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın de qatysyp, sóz sóıledi.
Silkroad Innovation Hub aımaqtaǵy IT kásipqoılar, kásipkerler jáne ınnovatorlar arasynda jelilik, bilim almasý jáne seriktestikterdi damytýdyń basty platformasy retinde qyzmet etedi. Ortalyq Eýrazııa elderiniń resmı tulǵalary men dıplomattary qatysqan habtyń ashylý rásiminde Baǵdat Mýsın hab Ortalyq Azııadan jańa startap jobalardy tartý núktesine aınalatynyn jáne túrki elderiniń sıfrlyq sheshimderdi qoldaný aımaǵyn keńeıtýge baǵyttalǵan kúsh-jigerin biriktiretinin atap ótti.
– El Prezıdenti Qasym-Jomart Toqaev jýyrda Dýshanbede sóılegen sózinde Qazaqstan sıfrlandyrý syndy strategııalyq mańyzdy salada óziniń jaqyn kórshilerimen yntymaqtastyǵyn barynsha nyǵaıtýdy qoldaıtynyn atap ótti. Al búgingi is-shara sózsiz osy baǵyttaǵy mańyzdy qadamdardyń biri bolyp otyr. Silkroad Innovation Hub jeke brendke aınalatynyna jáne Kremnıı alqabynda óziniń laıyqty ornyn ıelenetinine senimdimin, – dedi mınıstr.
Sonymen qatar IT ındýstrııaǵa qoldaý kórsetý aıasynda elimizdiń Sıfrlyq damý mınıstrligi Astana Hub jáne Silkroad innovation Hub-pen birlesip, Ortalyq Azııanyń startap-jobalarynyń TechCrunc álemdik kórmesine qatysýyn uıymdastyrdy. Mundaı joǵary deńgeıdegi forýmda alǵash ret Ortalyq Azııanyń IT ındýstrııasyn damytý boıynsha paneldik sessııa ótti.
Kremnıı alqabyndaǵy Silkroad Innovation Hub jobasyn uıymdastyrýshylar Ortalyq Eýrazııa startaptaryn ınnovasııalyq qoǵamdastyqqa qosylýǵa jáne perspektıvaly tehnologııalyq jobalardy qurý jáne damytý úshin usynylǵan múmkindikterdi paıdalanýǵa shaqyrady. Olar óz kúsh-jigerin biriktire otyryp, aldaǵy 5-7 jylda jaqsy nátıjelerge qol jetkizbek. Atap aıtqanda, startaptarǵa 300 mln dollar ınvestısııa, óńirden IT qyzmet eksportyna 1,5 mlrd dollar tartý josparlanǵan.
Jalpy, eń aýqymdy TechCrunch Disrupt 2023 halyqaralyq konferensııasy arqyly Ortalyq Eýrazııa startaptary úshin, onyń ishinde Qazaqstan, Qyrǵyzstan, О́zbekstan, Tájikstan, Mońǵolııa da bar, tarıhtyń jańa paraǵy ashyldy. TechCrunch Disrupt alańynda Silkroad Innovation Hub ınnovasııalyq ortalyǵy Kremnıı alqabyndaǵy ınvestorlarǵa eksklıýzıvti pavılon usyndy. Onda Ortalyq Eýrazııadan kelgen 14 startap ózderin jahandyq arenada tanytýǵa múmkindik aldy. Bulardyń ishinde 6-y – otandyq startap. Olar – Citix, Cyborgbase, TengriLights, Falcon.ai, Kscooter, Rhinotales jobalary. Sondaı-aq TechCrunch Disrupt 2023 aıasynda ınsýltti avtomattandyrylǵan dıagnostıkalaý úshin jasandy ıntellekt jáne neıroradıologııa salasynda mamandanǵan CerebraAI otandyq startapy álemdegi eń aýqymdy Startup battlefield 200 startap konkýrsyna qatysty.
Aıtpaqshy, Mońǵolııa, Qyrǵyzstan, Tájikstan, О́zbekstan memleketterinen kelgen startaptardyń basym bóligi Astana Hub-tyń akselerasııalyq baǵdarlamalarynyń túlekteri ekenin atap ótken jón. Qazirgi tańda olar álemdik naryqta óz jobalarynyń aıasyn keńeıtip jatyr.