Jaqyn arada kópbalaly, I jáne II top múgedektigi bar jandar, jetim jáne múmkindigi shekteýli balalardy tárbıelep otyrǵan otbasylar jańa páterlerge qonystanady. Aqtaý qalalyq ákimdigi baǵdarlama qatysýshylaryna arnalǵan turǵyn úılerdi 19A shaǵyn aýdanynan salyp berdi.
Olarǵa «Turǵyn úı-kommýnaldyq ınfraqurylymdy damytýdyń 2023-2029 jyldarǵa arnalǵan tujyrymdamasy» aıasynda Otbasy bankinen jyldyq 2% (JTSM 2,1%-dan bastap) mólsherlemesimen jeńildetilgen nesıe beriledi. Memlekettik baǵdarlamanyń sharttary boıynsha alǵashqy jarna nesıe somasynyń keminde 10 paıyzyna teń bolýǵa tıis.
Baspanaly bolǵandar qatarynda aqtaýlyq Zamıra Orynbaeva da bar. Múgedektigi bar bala tárbıelep otyrǵan ana osy kezge deıin páter jaldap, baspana taýqymetin tartqanyn aıtady.
«Bári shynaıy boldy. Ákimdikte de, bankte de jan-jaqty qoldaý kórsetti. Nátıjesinde, páterli boldym. 3 balam, joldasym bar. Otbasymyzben qýanyp jatyrmyz», deıdi Zamıra Orynbaeva.
Al 5 balanyń anasy Qaldygúl Nurmanova 2021 jyly úı kezegine turyp, «Otbasy bankte» qarajat jınaı bastaǵan. Sonyń arqasynda memlekettik baǵdarlamaǵa qatysyp, búgin baspanaly bolyp otyr.
«Memlekettik baǵdarlama bolmasa, bizge baspana alý qıynǵa soǵary anyq. 2 paıyzben berip jatyr. Alǵashqy jarna 10 paıyzdy ákimdik tólep berdi. Biz buǵan deıin Munaıly aýdanynda páter jaldap turǵanbyz. Búgin, mine, óz úıimizdiń kiltin alyp, tóbemiz kókke jetti. Elimizdiń basty merekesi Táýelsizdik kúninde bizge sheksiz qýanysh syılaǵandaryna rahmet», deıdi Qaldygúl Nurmanova.
Páter kiltterin tapsyrý rásimine Aqtaý qalasy ákiminiń orynbasary Darhan Abdalıev jáne «Otbasy bank» Mańǵystaý oblysy fılıalynyń basshysy Medet Ábýǵalıev qatysty. Jańa baspana ıelerine kiltpen qosa, qurylys kompanııasy men «Otbasy bank» atynan estelik syılyqtar da tabystaldy.
Osy is-sharanyń aıasynda baspana jármeńkesi de uıymdastyryldy. Oǵan 11 iri qurylys kompanııasy qatysyp, daıyn turǵyn úı keshenderinen páterler usyndy. Al «Otbasy banktiń» mamandary turǵyndarǵa ıpoteka alýdyń túrli jolyn kórsetip, sol arada tólemder somasynyń esebin shyǵaryp, túrli keńes berdi.
«Baspana jármeńkesin ótkizýdegi maqsatymyz – úı izdep júrgen ár turǵyn bir jerden qajetti aqparatty alsyn degen oı. Oǵan qosa, aldaǵy merekeler qarsańynda qurylys kompanııalary jeńildikter jasap jatyr. Oıyndar oınatady. Mundaı is-sharany jylyna 2-3 ret uıymdastyramyz», deıdi «Otbasy bank» AQ Mańǵystaý oblystyq fılıalynyń dırektory Medet Ábýǵalıev.
Jármeńkege kelýshiler qurylys kompanııalarynyń áralýan usynystarynyń ishinen ózderine ońtaılysyn taýyp, nysandy aralap kórý kúnin belgilep, jyljymaıtyn múlikti satyp alý boıynsha jan-jaqty keńes tyńdap qaıtty.