Senattyń jańa jyldaǵy alǵashqy otyrysy óńirlerdegi ózekti máselelerdi talqylaýmen bastaldy. Reseımen shekarada Qazaqstan kásipkerleriniń ónimderin tekserý merziminiń uzaqtyǵy otandyq óndirýshiler úshin problemaǵa aınalyp otyr. Senat Tóraǵasy Máýlen Áshimbaev bul rette erejeler barlyq qatysýshylar úshin birdeı bolý kerektigin aıtyp, osy túıtkilge qatysty Saýda jáne ıntegrasııa mınıstri Arman Shaqqalıevti jedel tıisti sharalar qabyldaýǵa shaqyrdy, dep habarlaıdy Egemen.kz.
«Taıaýda barlyq áriptesterimiz óńirlerden oraldy. О́zim de Atyraý oblysyna baryp, jergilikti turǵyndarmen, kásipkerlermen jáne máslıhat depýtattarymen kezdestim. Sondaı kezdesýlerdiń birinde kásipkerler osy máseleni kóterip, Reseıge taýarlaryn jetkizgen kezde 15-20 kúnge deıingi merzimdi alatyn veterınarlyq, sanıtarlyq, fıtosanıtarlyq sııaqty túrli tekseristerden ótýge májbúr ekenderin aıtty. Olar osyndaı ónimder bizdiń tarapqa kelgen kezde ne úshin veterınarlyq, sanıtarlyq, fıtosanıtarlyq jáne taǵy da basqa baqylaýlar tıisti deńgeıde júrgizilmeıtinin suraıdy. Negizi kelisim eki jaqqa birdeı. Eger bizdiń seriktesterimiz tekserip jatsa, biz de tekserýimiz kerek. Bul – ózara teńdikke qatysty másele. Eń bastysy, biz óz azamattarymyzdyń densaýlyǵyn qamtamasyz etýimiz qajet», degen Máýlen Áshimbaev óńirdegi kásipkerlerdiń narazylyǵyn jetkizdi.
Palata Spıkeri mundaı másele jaıdan-jaı kóterilmeıtinin, demek, bizdiń azamattar osyndaı jaǵdaımen jıi kezdesetetinin atap ótti.
«Osy máseleni óńirlerdegi turǵyndar jıi kóteredi. Bul neni bildiredi? Bul – memlekettik organdar tarapynan laıyqty jumys júrgizilmeıdi nemese biz kelisimniń sharttaryn tıisti deńgeıde oryndamaı otyrmyz degen sóz. Eger keıbir jerde kelisim talaptary óz deńgeıinde oryndalmaı jatsa, olardy iske asyrý úshin tıisti sharalar qabyldaǵan jón. Múmkin azamattarǵa qajetti aqparattar durys jetpeıtin shyǵar. Osy máseleni de nazarǵa alyp, zań aıasynda áreket etýimiz kerek», dedi Senat Tóraǵasy.
Saýda jáne ıntegrasııa mınıstri Arman Shaqqalıev atalǵan máseleniń óte ózekti ekenimen kelisip, osyǵan baılanysty búginde ahýaldyq shtab qurylǵanyn, shekaralarda kóshpeli is-sharalar ótkiziletinin jáne aldaǵy ýaqytta bul baǵyttaǵy jumysty kúsheıtetinin tilge tıek etti.
Aıta keteıik, búgin Palata otyrysynda depýtattar «2014 jylǵy 29 mamyrdaǵy Eýrazııalyq ekonomıkalyq odaq týraly shartqa ózgerister engizý týraly hattamany ratıfıkasııalaý týraly» zańdy qarap, maquldady. Bul zań quqyqtyq retteýdegi olqylyqtardy joıý arqyly eýrazııalyq ıntegrasııany odan ári damytýǵa arnalǵan.
Hattama arqyly EAEO týraly shartqa kedendik shekaradaǵy memlekettik baqylaý máselesine qatysty ózgerister men tolyqtyrýlar engiziledi.