Ortalyq referendým komıssııasy respýblıkalyq referendýmda daýys berýdiń aldyn ala nátıjelerin jarııalady. Atap aıtqanda, daýys bergen halyqtyń 71,12 paıyzy AES qurylysyn qoldady.
– 7 qazandaǵy tańǵy saǵat 08.00-degi jaǵdaı boıynsha elimizdiń barlyq óńirindegi jáne sheteldegi 10 323 referendým ýchaskesinde daýystardy sanaý aıaqtaldy. Oblystyq, Astana, Almaty jáne Shymkent qalalarynyń komıssııalarynan alynǵan jedel derekterdiń negizinde Ortalyq referendým komıssııasy daýys berýdiń aldyn ala qorytyndysyn shyǵardy, – dedi Ortalyq referendým komıssııasynyń tóraǵasy Nurlan Ábdirov ORK-da ótken brıfıngte.
Alynǵan málimetterge sáıkes, referendýmǵa qatysýǵa quqyǵy bar azamattardyń jalpy sany 12 mıllıon 284 myń 487 adamdy quraǵan. Daýys berýge 7 mıllıon 820 myń 204 adam (63,66%) qatysqan.
– Qazaqstanda AES salý týraly referendýmǵa qoıylǵan máseleniń oń sheshimin jaqtap daýys bergen azamattardyń sany elimizdiń barlyq óńirinde daýys berýge qatysqandardyń 71,12 paıyzyn nemese 5 mln 561 myń 937 adamdy qurady. Qazaqstanda AES salý týraly referendýmǵa qoıylǵan máselege qarsy daýys bergen adamdardyń sany daýys berýge qatysqandardyń ishinen 2 mln 45 myń 271 boldy, – dedi N.Ábdirov.
ORK tóraǵasynyń málimetinshe, «ıá» jáne «joq» degen jaýaptardyń eki nusqasy da tańdalǵan, olar – jaramdy bıýlletender. Daýystardy sanaý kezinde esepke alynbaıtyn bıýlletender sany 82 729-dy quraǵan. 130 267 bıýlleten jaramsyz dep tanylǵan.