Senat spıkeri Máýlen Áshimbaevtyń tóraǵalyǵymen palata otyrysy ótti. Onda senatorlar Konstıtýsııalyq Sot sýdıasynyń ókilettigin toqtatý jáne laýazymynan bosatý máselesin qarady. Sondaı-aq depýtattar kórý qabileti buzylǵan azamattardyń aqparat alýyn qoljetimdi etetin qujatty ratıfıkasııalady. Otyrysta ózge de máselege qatysty depýtattyq saýal joldandy.
Marrakesh shartynyń mańyzy
Basqa jumysqa aýysýyna baılanysty Erlan Sársembaev Senat sheshimimen Konstıtýsııalyq Sot sýdıasy laýazymynan bosatyldy. Reglamentke sáıkes bul máseleni Konstıtýsııalyq zańnama, sot júıesi jáne quqyq qorǵaý organdary komıtetiniń depýtattary aldyn ala talqylady.
Sondaı-aq otyrys barysynda palata depýtattary «Zaǵıptardyń jáne kórý qabileti buzylǵan nemese baspa aqparatyn qabyldaý qabileti ózgedeı shektelgen adamdardyń jarııa etilgen týyndylarǵa qol jetkizýin jeńildetý týraly Marrakesh shartyn ratıfıkasııalaý týraly» zańdy qarap, maquldady.
Depýtattar atap ótkendeı, eldiń Marrakesh shartyna qosylýy kórý qabileti nashar adamdardyń kitap, jýrnal, oqý materıaldaryna qoljetimdiligi artady, sondaı-aq olardyń qoǵamnyń mádenı jáne áleýmettik ómirine erkin aralasyp ketýine múmkindik beredi. Atap aıtqanda, kelisim aıasynda taraptar arasynda qoljetimdi formattaǵy danalarmen almasý jáne olardy ımporttaý tetikteri qarastyrylǵan.
Elimizde tolyqqandy ınklıýzıvti orta qalyptastyrýǵa jáne bul saladaǵy máselelerdi sheshýge barlyq deńgeıde júıeli ári keshendi jumys júrgizý qajet. Sondaı-aq memlekettik organdar men sarapshylardyń ózara tyǵyz baılanysy da mańyzdy. Muny qabileti buzylǵan azamattarǵa aqparattardyń qoljetimdiligin jeńildetý týraly zańdy qaraý kezinde Senat tóraǵasy Máýlen Áshimbaev aıtty.
– Múmkindigi shekteýli balalardyń, onyń ishinde kórý qabileti buzylǵan jetkinshekterdiń sapaly bilim alýyna jaǵdaı jasaý – memlekettiń negizgi mindetteriniń biri. Konstıtýsııamyzda da bárine teń múmkindikter qalyptastyrý týraly normalar bar. Solardy iske asyrýymyz kerek. Sondaı-aq bul – bizdiń adamgershilik mindetimiz. Osy baǵytta mınıstrlik tarapynan aýqymdy jumys atqarylyp jatqanyn bilemiz. Sonymen qatar atalǵan saladaǵy máselelerdi júıeli jáne tolyqqandy sheshýge bizdiń depýtattardyń bastamasymen tıisti zań jobasy ázirlenip jatyr. Ol bilim berý júıesinde ınklıýzıvti ustanymdardy attyrýdy kózdeıdi, – dedi Senat tóraǵasy.
Jalpy, bul salada kóptegen másele bar. Senat spıkeriniń aıtýynsha, tıisti mamandar daıarlaýǵa, mektepterdegi arnaıy synyptardyń materıaldyq-tehnıkalyq bazasyn jetildirýge qatysty túıtkilder kóp.
– Sondyqtan atalǵan zań qabyldanǵannan keıin osyndaı máselelerdi sheshýge yqpal etedi dep senemiz. Búginde senatorlar bul salada belsendi jumys júrgizip jatyr, – dep M.Áshimbaev múddeli taraptardy ortaq maqsat jolynda birlesip jumys isteýge shaqyrdy.
Qonaev qalasyn damytýǵa qarjy qarastyrylmaǵan
Sonymen qatar palata otyrysynda senator Sultan Dúısembınov Úkimetke Qonaev qalasyndaǵy ınfraqurylymdy damytýǵa qarjy qajet ekenin aıtyp, 2023–2025 jyldarǵa arnalǵan bıýdjetti naqtylaý kezinde respýblıkalyq bıýdjetten nysanaly transfertter qarastyrýdy usyndy.
Qonaev qalasyna Almaty oblysynyń ortalyǵy mártebesi berilgennen keıin qalada ınjenerlik, energetıkalyq, áleýmettik jáne ákimshilik nysandardyń qurylysyna qarjy qajettigi sezile bastaǵan. Alaıda senator S.Dúısembınovtiń aıtýynsha, bul jumystardy iske asyrýǵa qarjy qaralmaǵan.
– «Arna» qosalqy elektr stansasynyń qurylysy – strategııalyq mańyzy bar joba. Muny iske asyrý óńirdiń ekonomıkalyq jáne ónerkásiptik damýyna qýatty serpin bolatyny anyq. Ol jańa jumys oryndaryn qurýǵa, óndiristik jáne áleýmettik obektilerdi energııamen qamtamasyz etýge, sondaı-aq oblystyń ınvestısııalyq tartymdylyǵyn arttyrýǵa múmkindik beredi, – dep atap ótti depýtat.
О́ńirdegi jumystar bastalǵanyna qaramastan, 2023–2025 jyldarǵa arnalǵan bıýdjette birneshe jobany qarjylandyrý nazardan tys qalǵan. Bul qalany damytýǵa baǵyttalǵan sharalardyń ýaqtyly oryndalýyn qıyndatyp otyr. Atap aıtqanda, bular – ákimshilik ǵımarattar, energetıka jáne kólik kommýnıkasııalary, sondaı-aq bilim berý jáne mádenıet mekemeleri sııaqty strategııalyq nysandar.