Belarýs Respýblıkasynyń ortalyq saılaý komıssııasy jeksenbide ótken prezıdent saılaýynyń aldyn ala qorytyndysyn jarııalady. Saılaýshylardyń basym bóligi Aleksandr Lýkashenkoǵa daýys bergen.
Saılaýda A.Lýkashenko – 86,82 paıyz, Belarýs kommýnıstik partııasy ortalyq komıtetiniń birinshi hatshysy Sergeı Syrankov – 3,21 paıyz, Belarýs lıberal-demokratııalyq partııasy tóraǵasy Oleg Gaıdýkevıch – 2,02 paıyz, Ulttyq jıynnyń burynǵy depýtaty Anna Kanopaskaıa – 1,86 paıyz jáne Belarýstyń eńbek jáne ádilet partııasynyń tóraǵasy Aleksandr Hıjnıak 1,74 paıyz daýys jınaǵan.
Kandıdattardyń barlyǵyna qarsy daýys bergender 3,6 paıyzdy quraǵan. Jalpy saılaýǵa halyqtyń 85,7 paıyzy qatysqan. Saılaýdyń naqty qorytyndysy 3 aqpanda jarııalanady.
Saılaýǵa tek Belarýsta turatyn azamattar qatysqan, shetelde saılaý ýchaskeleri ashylǵan joq.
Qazaqstan Respýblıkasy Parlamenti Senatynyń depýtattary Nurlan Beknazarov pen Sáken Arýbaev halyqaralyq baıqaýshylar retinde Belarýs Respýblıkasyndaǵy prezıdent saılaýyn monıtorıng jasaýǵa qatysty. Nurlan Beknazarov saılaýdy baıqaýǵa Belarýs Respýblıkasynyń Ulttyq jınalysynyń shaqyrýymen, al Sáken Arýbaev TMD Parlamentaralyq Assambleıasynyń aıasynda qatysty.
«Belarýs Respýblıkasyndaǵy prezıdent saılaýyn uıymdastyrý deńgeıiniń joǵary ekenine, halyqaralyq standarttarǵa sáıkestigine kýá boldyq. Saılaý úderisiniń ashyqtyǵy men aıqyndyǵy eldegi demokratııalyq ınstıtýttardyń jetilgendigin bildiredi. Meniń oıymsha, jańadan saılanǵan prezıdent bizdiń memleketter arasyndaǵy yntymaqtastyqty nyǵaıtý baǵytyn jalǵastyrady, al ekijaqty qarym-qatynas ózara qurmet pen senim negizinde odan ári damı túsedi», dep atap ótti N.Beknazarov.
Depýtattar sapar barysynda daýys berý ýchaskelerin, onyń ishinde ortalyqtan alys aýdandardaǵy ýchaskelerdi de aralady.
«Saılaý úderisi joǵary deńgeıde uıymdastyrylǵanyn kórip otyrmyz. Azamattarǵa óz erkin esh kedergisiz bildirýge barlyq jaǵdaı jasalǵan. Bul saılaýǵa jáne eldegi demokratııalyq úderisterge degen senimdi nyǵaıtýǵa yqpal etedi», dedi senator S.Arýbaev.