Qazaqstan ekonomıkasy munaı óndirýdi ulǵaıtý jáne jalǵasyp jatqan fıskaldyq qoldaý nátıjesinde 2025 jyly 4,5-5,0% -ǵa ósedi. Bul týraly Dúnıejúzilik banktiń jańa baıandamasynda aıtyldy, dep habarlaıdy Egemen.kz.
Baıandamada sondaı-aq ınflıasııanyń 2025 jylǵa qaraı 7,5-8% -ǵa deıin jáne 2026 jyly 6% -ǵa deıin birtindep tómendeýi boljanyp otyrǵany aıtyldy. Degenmen, valıýtanyń jalǵasyp otyrǵan fıskaldyq keńeıýi men ulǵaıyp kele jatyrǵan qubylmalylyǵy ınflıasııalyq qysymdy nysanaly deńgeıden joǵary ustap tura alady.
«Qazaqstannyń fıskaldyq saıasaty 2025-2026 jyldary joǵary bıýdjet tapshylyǵymen yntalandyrýshy bolyp qalyp otyr. Memlekettik borysh basqarylatyn bolyp qalǵanymen, ishki qaryz alýǵa jáne fıskaldyq tapshylyqty jabý úshin QR-nyń Ulttyq qorynan qarajatty alýǵa táýeldiliktiń artýy Qordyń uzaq merzimdi turaqtylyǵyna qatysty alańdaýshylyq týǵyzady. Bul baıandamada biz osy problemalardy sheshý úshin fıskaldyq tártiptiń jáne tabys kózderin ártaraptandyrýdyń mańyzdylyǵyn atap ótemiz», dedi Dúnıejúzilik banktiń Qazaqstandaǵy turaqty ókili Andreı Mıhnev.
Baıandama jahandyq suranys pen munaı baǵasynyń tómendeýin qamtıtyn negizgi táýekelderdi, ıaǵnı, uzaqqa sozylǵan fıskaldyq keńeıý jáne tótenshe aýa raıy qubylystarynyń ınfraqurylym men ekonomıkalyq belsendilikke teris áserin atap kórsetedi.
Zertteýge sáıkes, Qazaqstannyń salyqtyq kiristeri basqa elderdiń uqsas kórsetkishterinen aıtarlyqtaı artta qalyp otyr, bul negizgi memlekettik qyzmetter men uzaq merzimdi basymdyqtardy qarjylandyrýdy shekteıdi. Baıandamanyń arnaıy bólimi kiristerdi jumyldyrý boıynsha reformalardy talqylaıdy. Baıandamada fıskaldyq problemalardy sheshý úshin salyq reformasynyń keshendi baǵdarlamasy baıandalǵan. Usynylyp otyrǵan reformalar tabys salyǵynyń progressıvti júıesine kóshýdi, tıimsiz salyq jeńildikterin kezeń-kezeńimen toqtatýdy, QQS reformalaryn, aksızdik salyqtardy ekologııalyq maqsattarǵa sáıkestendirýdi jáne salyqtyq ákimshilendirýdi jaqsartýdy qamtıdy.
Qazaqstandaǵy ınfraqurylymnyń aǵymdaǵy jaı-japsary ónimdilikti arttyrý jáne úzdiksiz jáne tıimdi memlekettik qyzmetterdi qamtamasyz etý úshin qajetti salaǵa memlekettik ınvestısııalardy ulǵaıtýdy talap etedi. Sondyqtan damýdyń uzaq merzimdi basymdyqtaryn qajetti qarjylandyrý úshin fıskaldyq kiristerdi ulǵaıtý asa mańyzdy.
Qazaqstan ekonomıkasy týraly «Bolashaqty qarjylandyrý: uzaq merzimdi ınvestısııalar úshin kiristerdi ulǵaıtý» atty baıandamada aıtylǵan.