Sý resýrstary jáne ırrıgasııa mınıstrligi Almaty, Jetisý, Jambyl, Túrkistan, Qyzylorda oblystarynda sý únemdeý tehnologııalaryn engizý boıynsha sharýalarǵa arnalǵan semınarlar ótkizip jatyr, dep habarlaıdy Egemen.kz.
Kezdesýler barysynda elimizdegi sý únemdeý boıynsha úzdik tájirıbeler tanystyrylyp, memlekettik qoldaý is-sharalary jóninde aqparat beriledi.
«Sý resýrstary jáne ırrıgasııa mınıstrligi Aýyl sharýashylyǵy mınıstrligimen birge sharýalardy qajet ınfraqurylymdy qalyptastyrý, sý únemdeý júıelerin satyp alý jáne ornatý shyǵyndaryn sýbsıdııalaý mólsherin 50%-dan 80%-ǵa deıin arttyrdy. Sonymen qatar, búginde sý únemdeý tehnologııasyn qoldanatyn dıqandar sýarmaly sý úshin az tóleıdi. Sebebi, sý únemdeý júıelerin paıdalanǵan kezde sýarmaly sý aqysyn sýbsıdııalaý mólsheri tarıfke baılanysty 85%-ǵa deıin ulǵaıtyldy», dedi Sýdy únemdeý tehnologııalaryn damytý departamentiniń dırektory Berikbol Mándibaev.
Sala mınıstrliginiń baspasóz qyzmetiniń málimdeýinshe búginde Qazaqstanda sý shashatyn mashınalar men tamshylatyp sýarý jabdyǵyn shyǵaratyn 4 otandyq zaýyt jumys isteıdi. Bıyl Túrkistan oblysynda qytaılyq kompanııalarmen birlesip tamshylatyp sýarý jabdyǵyn shyǵaratyn taǵy 2 zaýyt ashý josparlanyp otyr.
Budan bólek, Sý resýrstary jáne ırrıgasııa mınıstrligi sý únemdeıtin ınnovasııalyq tehnologııalardy da synaqtan ótkizip jatyr. Máselen, byltyr elimizdiń jetekshi ǵylymı-zertteý ınstıtýttarymen birlesip majarlyq Water-Retainer preparaty synaqtan ótti. Synaq nátıjesi jekelegen daqyldar boıynsha sý únemdeý jáne ónimdilikti arttyrý boıynsha oń áserin kórsetti. Aldyn ala málimet boıynsha, preparatty qoldaný shamamen 20-37% sý únemdeýge múmkindik beredi, sonymen qatar ónimdilikti jaqsartady.